Tesco
Tesco PLC is 'n Britse multinasionale kleinhandelmaatskappy met sy hoofkwartier in Cheshunt in die Engelse graafskap Hertfordshire. Dit is die wêreld se derde grootste kleinhandelreus volgens wins en die tweede grootste volgens omset. Tesco bedryf winkels in twaalf lande dwarsoor Europa en Asië en is die leidende supermarkgroep in die Verenigde Koninkryk (waar dit 'n markaandeel van sowat 30 persent het), die Republiek van Ierland, Hongarye, Maleisië en Thailand.
| Tesco PLC | |
  | |
| Tipe | Britse publieke maatskappy met beperkte aanspreeklikheid (PLC) |
|---|---|
| Gestig | 1919 in Hackney, Londen, Engeland |
| Hoofkantoor | Cheshunt, Hertfordshire, Engeland, .svg){kind=small} Verenigde Koninkryk
|
| Sleutelpersone | Dave Lewis (hoof uitvoerende beampte van die groep) Sir Richard Broadbent (voorsitter) |
| Gebied bedien | Wêreld |
| Industrie | Kleinhandelsbedryf |
| Produkte | Hipermarkte, supermarkte, superwinkels |
| Inkomste |  £70,894 miljard (2013/14) |
| Bedryfsinkomste |  £3,054 miljard (2013/14) |
| Netto inkomste | £124 miljoen (2013) |
| Werknemers | 440 000 (2018) |
| Dogter- maatskappye | Tesco Stores Ltd. Tesco Bank Tesco Mobile Dobbies Garden Centres Giraffe Restaurants Dunnhumby |
| Webwerf | tesco.com |
Tesco is deur Jack Cohen in 1919 as 'n kleinhandelonderneming gestig wat markstalletjies bedryf het. Van 'n beskeie begin - Cohen het sy ware aanvanklik op 'n enkele kruiwa op Well Street in die Londense stadsdeel Hackney verkoop nadat hy van sy deelname aan die Eerste Wêreldoorlog teruggekeer het[1] - het Tesco tot 'n handelsreus gegroei wat nie net by Sainsbury's, wat ses dekades lank die grootste Britse supermarkgroep was, verbygesteek het nie, maar sy bedrywighede ook na vastelandse Europa en oorsese lande uitgebrei het.
Die handelsnaam Tesco is vir die eerste keer in 1924 gebruik nadat Cohen 'n lading tee van T. E. Stockwell gekoop het en dié se inisiale met die eerste twee letters van sy familienaam gekombineer het. Die eerste Tesco-winkel is in 1929 in Burnt Oak in Barnet geopen. Die winkelgroep het vinnig uitgebrei, en tien jaar later was daar reeds meer as 100 Tesco-winkels dwarsoor die land.
Oorspronklik het Tesco hoofsaaklik koswinkels bedryf en op die Britse mark gefokus, maar vanaf die vroeë 1990's het die onderneming begin om sy bedrywighede geografies te diversifiseer en tot verdere kleinhandelsektore toe te tree, waaronder boeke, klere, elektroniese verbruikersware, meubels, speelgoed, petrol en sagteware. Daarnaas is ook 'n verskeidenheid dienste aan klante verskaf, soos finansiële dienste, telekommunikasie en internet.
Die negentigerjare was vir Tesco ook 'n dekade van herposisionering. Nadat die groep se winkels deur klante tradisioneel as ondernemings in die laepryssegment waargeneem is, het Tesco nuwe produkreekse soos Tesco Value (in 1993) en Tesco Finest ingevoer om die behoeftes van verbruikers op alle inkomstevlakke te kan bevredig. Hierdie strategie was só suksesvol dat die aantal Tesco-winkels van 500 teen die middel van die 1990's tot meer as 2 500 vyftien jaar later gegroei het.
Tesco se aandele word op die Londense Effektebeurs (LEB) genoteer en maak deel uit van die FTSE 100-indeks. Die groep het in 2014 'n markkapitalisasie van sowat £20,5 miljard gehad. Dit was sodoende die 28ste grootste onderneming met 'n primêre notering op die LEB. Met meer as 300 000 werknemers in sowat 3 400 supermarkte is Tesco die grootste privaat werkgewer in die Verenigde Koninkryk. Tesco se sakemodel word egter uitgedaag deur snelgroeiende Duitse afslagwinkelkettings soos Aldi en Lidl. Vroeg in 2019 het Tesco se bestuurders nuwe maatreëls aangekondig om koste te besnoei. Hierdeur sal tot 15 000 werkgeleenthede bedreig word.[2]
Verwysings
wysig- ↑ Sarah Ryle: The Making of Tesco - A Story of British Shopping. Voorwoord. London: Transworld Publishers/Bantam Press 2013
- ↑ The Guardian, 27 Januarie 2019: Thousands of Tesco jobs at risk as bosses look to axe fresh food counters. Besoek op 27 Januarie 2019