The Handmaid's Tale

The Handmaid's Tale is 'n distopiese en spekulatiewe roman, geskryf deur die Kanadese outeur Margaret Atwood. Dit is die eerste keer in 1985 gepubliseer. Die verhaal speel af in Nieu-Engeland en dit skets 'n militêre teokratiese bewind wat in die nabye toekoms die bestaande Amerikaanse regering omverwerp om die fiktiewe Republiek van Gilead te skep.

Die belangrikste tema wat in The Handmaid's Tale ontwikkel word is die onderdrukking en onderwerping van vroumense binne 'n patriargale samelewing. Die roman vertel die storie van Offred (wie se naam afgelei is vanuit die besitlike vorm, "of Fred"). Soos enige dienares in haar samelewing word sy verbied om haar geboortenaam te gebruik, en moet haar naam haar meester of kommandeur se naam weerspieël. Offred is deel van 'n klas vrouens wat steeds vrugbaar bly tydens 'n era wanneer geboortesyfers drasties afgeneem het. Hierdie vrouens word geforseer om kinders vir die regerende klas te baar. Deur middel van 'n eerstepersoonverteller skets Atwood Offred se storie voor en tydens die rewolusie wat al haar regte as vrou weggeneem het, tesame met haar oorlewing as dienares in die Republiek van Gilead.

Atwood het twee groot toekennings gewen vir The Handmaid's Tale: die 1985 Governor General's Award vir letterkunde, asook die eerste Arthur C. Clarke Award vir wetenskapfiksie wat in 1987 toegeken is. Verder was haar roman ook genomineer vir die Gemenebes se 1986 Booker-prys. Dit is aangepas in 'n gelyknamige film (1990), opera (2000) en televisiereeks (2017).

The Handmaid's Tale is een van die 100 boeke in Amerika wat die gereeldste deur konserwatiewe dorp- en skoolgemeenskappe uitgedaag word, met die oog daarop dat die boek van voorgeskrewe leeslyste geskrap moet word en selfs uit biblioteke verwyder moet word. Hierdie veldtogte gebeur grootliks weens die roman se kontroversiële uitbeelding van 'n ontluikende feministiese wêreldbeskouing binne 'n teokratiese patriargie.