Thor (Oudnoors: Þórr) is een van die gode bekend as Ase in die Noorse mitologie. Hy is 'n belangrike, hamerswaaiende god wat verbind word met weerlig, donderweer en storms, heilige bome, krag, die beskerming van die mensdom en vrugbaarheid.

Thor se geveg teen die reuse, deur Mårten Eskil Winge (1872).

Beskrywing wysig

Thor is een van die gode wat dikwels genoem word in die geskiedenis van die Germaanse volke. In die Noorse mitologie, wat grootliks in Ysland opgeteken is, het Thor 15 name, is hy die man van die godin Sif met haar goue hare en die minnaar van die trol Járnsaxa. Hy het gewoonlik vurige oë, rooi hare en 'n rooi baard.[1]

By Sif is Thor die vader van die godin (en moontlik walkure) Þrúðr, by Járnsaxa het hy die kinders Móði en Magni en hy is die stiefpa van die god Ullr. Deur sy pa, Odin, het Thor talle broers, insluitende Balder. Thor ry in 'n kar wat deur twee bokke, Tanngrisnir en Tanngnjóstr, getrek word en swaai 'n hamer rond in gevegte teen sy vyande. Dié gevegte, insluitende die een teen die monsteragtige slang Jörmungandr, word in verskeie Noorse verhale vertel, asook hulle wedersydse sterftes tydens die gebeure van Ragnarök.

In moderne tye kom Thor steeds voor in folklore dwarsdeur die Germaanssprekende Europa. Hy kom voor in plekname, veral in Skandinawië, en in die dag Donderdag. Thor was die inspirasie vir talle kunswerke en verwysings na hom verskyn in moderne kultuur. Nes ander Germaanse gode, word hy steeds vereer in Germaanse neopaganisme.

Verwysings wysig

  1. H.R. Ellis Davidson, Gods and Myths of Northern Europe, 1964, Harmondsworth, Middlesex: Penguin, 1990, ISBN 0-14-013627-4, p. 85

Skakels wysig