Tilla Diedericks

Tilla Diedericks (gebore 16 Junie 1946) is ’n Afrikaanse aktrise, dramadosent en digter.

Lewe en werk

Tilla Diedericks is op 16 Junie 1946 gebore. Sy matrikuleer aan die Hoërskool J.J. du Preez in die Kaap en studeer dan verder aan die Universiteit van Stellenbosch. Sy is getroud met Jannie Diedericks, adjunk-hoof van die Laerskool Brackenfell; hulle het twee seuns, Rigard en Dieter. Sy sluit aan by die Bellville Afrikaanse Toneelvereniging, waar sy aan produksies begin deelneem. Vanaf 1975 studeer sy aan die Akademie vir Dramakuns, waar sy in 1977 haar Lisensiaat in Spraak en Drama behaal. Hierna tree sy op in verskeie televisiereekse, onder andere Geknelde land (waarin sy die vroulike hoofrol vertolk), Ouens soos ons, Die seeduiker, Ou grote, Jackpot en Vloeksteen en in die enkeldrama Lied van die lappop, terwyl sy ook ’n rol in die sepie 7de Laan en Suid-Ooster vertolk het. Op die verhoog tree sy op in onder andere Die held, Papawerwyn, Die Van Aardes van Grootoor, Kat in die donker, Die aand van 16 Januarie, Library tours, The Effect of Gammarays on the Man in the Moon, Ek onthou vir Mamma en Hups in die hydro.

Vanaf 1980 tot 2002 besit sy haar eie dramaskool in Brackenfell in Kaapstad (die Brackenfell Spraak en Dramaskool), terwyl sy televisiewerk, radiowerk (onder andere in die radiovervolgverhaal Die kollig) en oorklankingswerk doen. In hierdie tyd doen sy werk vir die Kaapse Raad vir Uitvoerende Kunste (KRUIK) en bied onder andere ’n biblioteek-toerprogram in Wes-Kaapland aan, waar sy saam met Diane Wilson opvoerings in dorpe soos Hermanus, Langebaan, De Doorns en Piketberg doen. As regisseur hanteer sy verskeie opvoerings en word onder andere as beste regisseur aangewys vir die toneelstukke Dis nou te laat en Wit leuens en swart dade in onderskeidelik die landwye ATKV-kompetisie en die Vishoek Toneelfees. Na sluiting van haar dramaskool doseer sy drama aan Curro Private School en later Hoërskool Tygerberg, terwyl sy steeds private klasse gee, onder andere vir leerlinge van Laerskool Gene Louw. As drama-beoordelaar tree sy op by eisteddfods, onder andere by die 2014 George Loerie-eisteddfod en die 2015 Calvinia-eisteddfod en die 2016 Mosselbaai-eisteddfod. In 2002 tree sy op by Woordfees op Stellenbosch, waar sy van haar eie gedigte voorlees. Van haar artikels verskyn op LitNet, waar sy onder andere haar oorsese reis na Thailand beskryf. Sy bly in Brackenfell in die Kaap.

Skryfwerk

As digter debuteer sy in Nuwe stemme 1 en van haar verse word opgeneem in Groot verseboek en Die Afrikaanse poësie in ’n duisend en enkele gedigte. Hierdie gedigte handel oor die gewaarwordings van ’n ontgogelde huisvrou, die liefde en herinneringe. Sy lewer ook sosiale kommentaar. Vir die bekende sangeres Lise-Stassen Coen en ander skryf sy soms lirieke.

Bronnelys

Koerante

• Heunis, Martia “Tilla wou al kleintyd teaterligte op haar voel”. Die Burger. 1 Maart 1990
• Tygerbergse kantoor “Tilla sal wag tot 80 vir al die nodige plooie”. Die Burger. 2 Februarie 1989
• Die Burger: http://152.111.1.87/argief/berigte/dieburger/1989/02/02/8/15.html

Internet

• Esat: http://esat.sun.ac.za/index.php/Tilla_Diedericks
• Heunis, Martia: http://m24arg02.naspers.com/argief/berigte/dieburger/1990/03/01/12/6.html^{[dooie skakel]}
• LinkedIn: http://za.linkedin.com/in/tilla-diedericks-b2672519^{[dooie skakel]}