Titulus Regius

Titulus Regius ("koninklike titel" in Latyn) is ’n wet van die parlement van Engeland van 1484 waarkragtens die titel "Koning van Engeland" aan Richard III gegee is.

Die wet het ’n deklarasie van die Hoër- en Laerhuis ’n jaar vantevore bekragtig dat die huwelik van Eduard IV van Engeland met Elizabeth Woodville ongeldig was – daardeur was Edward, Richard, Elizabeth en die ander kinders dus buite-egtelik en het hulle almal hulle aanspraak op die troon verloor. Richard III is as die regmatige koning aangewys. Aangesien die Hoër- en Laerhuis nie amptelik as ’n parlement byeengekom het nie, het vrae ontstaan oor die geldigheid van die deklarasie; toe die parlement dus byeenkom, is die deklarasie ’n wet gemaak.

Nadat Richard III se bewind omvergewerp is, is die wet herroep deur die eerste parlement van die nuwe koning, Hendrik VII. Dit was ’n belangrike stap, want die nuwe koning en sy ondersteuners het Richard III se bewind as troonrowery beskou. Dit het ook die wettigheid van Eduard IV en Elizabeth Woodville se kinders herstel, onder andere dié van Elizabeth van York, met wie Hendrik belowe het hy sou trou as hy die troon bestyg.

VerwysingsWysig