Tjaart van der Walt-gedenknaald
Die burgerkommandant Tjaart van der Walt het op 8 Augustus 1802 tussen die Baviaanskloofberge en die Kougarivier gesneuwel en is op die plaas Cambria (toe bekend as Onverwacht) begrawe.
Op aanwysings van Walter Smith het die Humansdorpse Kultuurvereniging die graf in 1949 opgespoor. Van der Walt se oorskot is op 10 Oktober 1950 opgegrawe en herbegrawe langs die Goede Hoop-kerksaal. Dit is 'n 8 km van waar hy gesterf het. Die Geloftefeeskomitee van die Gamtoosvallei het 'n gedenknaald op sy nuwe graf opgerig. Van der Walt was die eerste Boere-kommandant wat in Suid-Afrika op die slagveld geval het.
Die obelisk kan bereik word deur met die R332-pad vanaf Patensie noordwes te ry tot net buite die suidelike hek van die Baviaanskloof Wildernisarea.
Bibliografie
wysig- Logie, Bartle: Governer's travels. A journey along the Kouga/Tsitsikamma coast. Hunters Retreat: Bluecliff, 1999. ISBN 0-620-24152-7
- Malan, George F.: Die brullende leeu getem. Die geskiedenis van die mense en die ontwikkeling van besproeiingsboerdry in die Gamtoosvallei. Patensie, 1970.