Tjaart van der Walt
- Moet nie verwar word met Prof Tjaart van der Walt (akademikus) (1934–2019) nie
Tjaart van der Walt (1749 – 8 Augustus 1802) was 'n kommandant-generaal in die Kaapkolonie.
Hy is op 30 Maart 1749 gedoop en vergesel in 1790 vir Jacob van Reenen op 'n ekspedisie na die Oosgrens om na die skipbreukelinge van die Grosvenor te soek. Twee jaar later vergesel hy 'n ekspedisie onder Nicolaas Smit om 'n bende San, wat vee gesteel het, te straf. Later in dieselfde jaar trek hy onder die kommandantskap van sy broer tot aan die Sakrivier om die Khoi verder te verdryf.
In die middel van 1790's is hy as kommandant van Swellendam aangestel en stuit in 1799 die aanval deur die Xhosas aan die Groot Swartberge. Daarna trek hy met 'n kommando Swellendammers ooswaarts om die vrede te help herstel. As erkenning vir sy dienste ontvang hy 'n tweeloopgeweer van genl. Francis Dundas, bevelvoerder van die Britse troepe aan die Oosgrens.
In 1802 val hy as kommandant-generaal die invallende Khoi-bendes oorkant die Sondagsrivier aan, waar een van sy seuns noodlottig gewond word. Hy sit die stryd teen die Khoi en Xhosas voort, maar word teruggeroep om 'n inval van die Khoi langs die Gamtoosrivier af te wend en word op 8 Augustus 1802 deur die Khoi-kaptein Boland verras en doodgemaak.
Sien ook
wysigBronne
wysig- Albertyn, dr. C.F. (red.), 1962. Afrikaanse Kinderensiklopedie. Kaapstad: Nasionale Boekhandel Beperk.