Tommaso Buscetta
Tommaso Buscetta (13 Julie 1928 – 2 April 2000[4]) was ’n Italiaanse bendelid en lid van die Sisiliaanse Mafia. Hy was die eerste Mafiabaas wat ’n informant (pentito) geword en die binnewerke van die organisasie verduidelik het.
| Tommaso Buscetta | ||
| ||
| Gebore | 13 Julie 1928 Palermo, Sisilië, Italië | |
| Oorlede | 2 April 2000 (op 71) Florida, VSA[1][2][3] | |
| Rede vir dood | Kanker | |
| Land |  Italië
| |
| Beroep | Gangster | |
| Misdaadbesonderhede | ||
| Misdaad | Dwelmsmokkelary, ontvoering | |
| Beweging | Sisiliaanse Mafia | |
| Vonnisbesonderhede | ||
| Vonnis | 14 jaar; later op parool vrygelaat | |
Buscetta was in Italië, die VSA en Brasilië by misdaad betrokke voordat hy aan Italië uitgelewer is, waar hy belangrike getuienis gelewer het in die grootste anti-Mafiaverhoor in die geskiedenis. Ná die moorde op die magistrate Giovanni Falcone en Paolo Borsellino het Buscetta verdere getuienis voor die anti-Mafiakommissie gelewer waarin hy Italiaanse politici met die Mafia verbind het. Buscetta het by die getuiebeskermingsprogram in Amerika aangesluit, waar hy gebly het tot met sy dood in 2000.
Vroeë lewe wysig
Buscetta is in Palermo, Sisilië, gebore as die jongste van 17 kinders. Hy het in ’n arm deel van Palermo grootgeword waaruit hy ontsnap het deur op ’n jong ouderdom by misdaad betrokke te raak. Hy het in 1945 die eerste keer by die Sisiliaanse Mafia betrokke geraak en in die jare daarna het hy ’n volle lid van die Porta Nuova-familie geword waar hy meestal met sigaretsmokkelary te doen gehad het.
Buscetta het ná die Ciaculli-bloedbad in 1963, wat deel van die Eerste Mafiaoorlog was, na die VSA gevlug. In New York het die plaaslike Gambino-misdaadfamilie van die Amerikaanse Mafia hom gehelp om ’n pizzarestaurant oop te maak. In 1968 is Buscetta deur ’n Italiaanse hof skuldig bevind aan ’n dubbele moord, maar die verhoor is in absentia gehou omdat hy nie in aanhouding was nie.
In 1970 is Buscetta in New York in hegtenis geneem, maar omdat die Italiaanse owerhede nie sy uitlewering gevra het nie, is hy vrygelaat. Hy het daarna na Brasilië getrek waar hy ’n dwelmsmokkelnetwerk begin het. In 1972 is hy deur die Brasiliaanse militêre regering in hegtenis geneem en aan Italië uitgelewer. Hier het hy lewenslange tronkstraf begin uitdien vir die vroeëre dubbele moord. In 1980 het hy, terwyl hy ’n dag vrylatingsverlof gehad het, teruggevlug na Brasilië om die dreigende Tweede Mafiaoorlog in Sisilië te ontsnap wat deur Totò Riina begin is. Die oorlog het eindelik gelei tot die dood van baie van Buscetta se bondgenote. In 1983 is hy weer in hegtenis geneem en na Italië teruggestuur. Omdat hy ontnugter was met die Mafia, het hy gevra om met die anti-Mafiamagistraat Giovanni Falcone te praat en so sy lewe begin as ’n informant, wat in Italië ’n pentito genoem word.
Pentito wysig
Buscetta het magistrate Giovanni Falcone en Paolo Borsellino gehelp om aansienlike sukses te behaal in hul stryd teen georganiseerde misdaad. Hy het die stergetuie geword in die Maxiverhoor, wat daartoe gelei het dat byna 350 Mafialede tronkstraf gekry het.
Buscetta het die bestaan en werking van die Sisiliaanse Mafiakommissie onthul verduidelik, en Falcone in staat gestel om te beslis Cosa Nostra was ’n verenige, hiërargiese struktuur wat deur ’n kommissie beheer word en dat sy leiers, wat gewoonlik nie self by misdade betrokke geraak het nie, verantwoordelik gehou kon word vir misdade wat gepleeg is om die organisasie te bevoordeel. Buscetta se getuienis in ’n verhoor in New York in die middel 1980's het ook gelei tot die skuldigbevinding van honderde mafiosi in Italië en Amerika.[5]
In ruil vir sy getuienis is Buscetta toegelaat om met ’n nuwe identiteit in Amerika te bly as deel van die land se getuiebeskermingsprogram. Hy het volgens berigte plastiese snykunde ondergaan om sy gesig te verander.[6]
Eers in 1992, ná die moorde op Falcone en Borsellino, die anti-Mafiamagistrate wat hy gehelp het, het Buscetta besluit om te praat oor die bande van politici met die Mafia.[7]
Buscetta is in 2000 op 71-jarige ouderdom aan kanker dood.
Verwysings wysig
- ↑ https://www.irishtimes.com/culture/first-they-ll-try-to-kill-me-then-it-ll-be-your-turn-warned-the-mobster-turncoat-1.262672
- ↑ http://news.bbc.co.uk/2/hi/programmes/from_our_own_correspondent/713538.stm
- ↑ https://www.nytimes.com/2019/06/12/arts/television/tommaso-buscetta-our-godfather.html
- ↑ (it) E' morto Tommaso Buscetta: Svelò i segreti di Cosa Nostra, La Repubblica, 4 April 2000
- ↑ The Mafia's Murderous Code[dooie skakel], Time Magazine, 11 November 1985
- ↑ Mob Boss and Stoolie Share a Day in Rome Court, The New York Times, 20 November 1993
- ↑ (it) Audizione del collaboratore della giustizia Tommaso Buscetta
Eksterne skakels wysig
- BBC-verslag oor Buscetta se dood
- (it) Giovanni Falcone: l'umanità del pentito Buscetta op YouTube
- (it) Buscetta e la Mafia sfila al Maxiprocesso di Palermo op YouTube
Hierdie artikel is vertaal uit die Engelse Wikipedia
