Tsumeb Gimnasium
Tsumeb Gimnasium is 'n tweetalige (Afrikaans en Engels) privaat skool op die Namibiese dorp Tsumeb, sowat 430 km noordnoordoos van die hoofstad, Windhoek.[1][2] Dit is een van net ses skole in die land waaraan Afrikaanse onderrig tot gr. 12 gebied word. Die ander is Windhoek Afrikaanse Privaatskool, Privaatskool Elnatan op Stampriet, Privaatskool Moria op Outjo, Keetmanshoop Privaatskool en Pro-Ed Akademie op Swakopmund. Slegs Moria, Elnatan en Keetmanshoop is uitsluitlik Afrikaans.
Tsumeb Gimnasium het in Januarie 1994 met 25 leerlinge en vyf onderwysers begin. In 2022 het die skool 330 leerders in 'n volwaardige preprimêre afdeling, tesame met 'n laer- en hoërskool gehad. Hulle is deur 32 onderwysers onderrig. Die skool het 'n Engelse baan in die primêre afdeling en vanaf 2022 ook in gr. 8. Leerders van elders gaan tuis in vier koshuise, een elk vir seuns en meisies in die hoër- en laerskool.
