Windhoek Afrikaanse Privaatskool

Windhoek Afrikaanse Privaatskool (WAP, bynaam Windhoek Affies) is die enigste skool in die Namibiese hoofstad Windhoek wat onderrig van gr. R tot 12 deur medium Afrikaans bied. Die skool maak deur middel van die Treintjieskool ook voorsiening vir onderrig aan kinders van gr. 000 tot gr. 0.

Die WAP het in 1995 begin in die vyf katkisasielokal onder die meerdoelige Deo Gloria-sentrum van die Gereformeerde kerk Windhoek-Suid.

WAP Studente

Hoewel al die groot dorpe in die land en die hoofstad minstens een privaat skool het wat onderrig aan meestal Afrikaanssprekende leerders deur feitlik uitsluitlik Afrikaanse onderwysers bied, word net aan die WAP en die volgende skole moedertaalonderrig tot in gr. 12 gebied: Keetmanshoop Privaatskool, Privaatskool Moria (Outjo), Privaatskool Elnatan (Stampriet), Tsumeb Gimnasium en Pro-Ed Akademie (Swakopmund). Op Gobabis, byvoorbeeld, geskied onderrig aan die Gobabis Gimnasium van gr. 4 af in Engels, en so ook aan die Berg-op Akademie op Okahandja.

Stigting

Die WAP het amptelik op 4 Maart 1995 geopen nadat die Namibiese ministerie van basiese onderwys en kultuur sy registrasie einde 1994 goedgekeur het. Piet Burger was die skoolhoof in die eerste jaar en is in 1996 opgevolg deur Johan Esbach. Ingevolge die land se nuwe Onderwyswet het die skool onder Esbach se leiding in 2004 opnuut geregistreer as ’n instelling wat onderrig in Afrikaans bied van gr. 1 tot 12 en waarvan gr. 12’s die Onafhanklike Eksamenraad (IEB) se eksamen aflê.

Die skool het in die jongste jare fenomenaal gegroei. Dit het geopen met 71 leerlinge, maar teen 2000 het die leerlingtal tot net 102 toegeneem. In 2003 het die leerlinge vir die eerste keer aan die Privaatskolenaweek deelgeneem. Teen 2004 het die leerlinge tot 266 toegeneem en is finaal weggedoen met gekombineerde klasse, waar meer as een graad saam onderrig ontvang. In 2012 het die leerlinge toegeneem tot 895. Vier jaar later, toe die skool sy 21ste bestaansjaar in 2016 vier, het die leerlinggetal 1 053 bereik.

Aan die begin was die WAP ’n Artikel 21-maatskappy, maar dit is later omskep in ’n vereniging nadat die regsaspekte en geldelike implikasies deeglik ondersoek is. Die direksie van die Artikel 21-maatskappy het toe plek gemaak vir die vereniging se beheerraad.

Terrein

Die skool het begin op die terrein van die Gereformeerde kerk Windhoek-Suid by Schlettweinstraat 64, Pionierspark, in wie se meerdoelige Deo Gloria-sentrum leerlinge toe onderrig is in die vyf katkisasieklasse onder die saal. In September 1997 kon die WAP na die huidige perseel in die voorstad Eros verskuif nadat ’n sakeman en vriend van die skool, André du Plessis, dit by die NG Kerk gekoop en tot die WAP se beskikking gestel het. Van toe af is die perseel algaande in ’n doelmatige skool omskep en groot aanbouings gedoen. Dié perseel het die skool in 2007 aangekoop en kon so vir die eerste keer op sy eie grond aanspraak maak. In 2009 het die Treintjieskool deel van die WAP geword. Hoërskoolklasse is in 2011 aangebou en ook is met die ontwikkeling van die sportvelde begin. In dieselfde jaar het is die skoolsaal, die André du Plessis-saal, in gebruik geneem. In die volgende jaar is die koshuis met ses inwoners begin. Die volgende voorwaartse stap was die ingebruikneming van die AffiesPark-klubuis in 2013.

Bron

• (af) Die WAP se geskiedenis op sy webtuiste. URL besoek op 18 Maart 2016.