USS Scorpion (SSN-589)
| Vaartuig klas | Skipjack-klas duikboot |
|---|---|
| Land | Verenigde State |
| Geografiese ligging | 32°54′54″N 33°8′54″W |
| Operateur | Amerikaanse Vloot |
| Vervaardiger | General Dynamics Electric Boat |
| Ligging van vervaardiging | General Dynamics Electric Boat |
| Openingsdatum | 29 Desember 1959 |
| Tuishawe | Naval Submarine Base New London |
Die USS Scorpion was 'n Skipjack-klas duikboot van die Amerikaanse Vloot wat na 'n moontlike ongeluk aan boord op 22 Mei 1968 gesink het.
Gedurende April 1968 was die Scorpion besig om saam met die Sesde Vloot aan 'n teenduikboot-oefening in die Middellandse See deel te neem. Die duikboot is skielik aan die oefening onttrek en na die Kanariese Eilande gestuur om Sowjet-aktiwiteite daar te ondersoek. Na drie dae het die Scorpion niks verdag opgemerk nie en is beveel om terug te keer na sy tuisbasis op 21 Mei 1968. Ses dae later is aangekondig dat die duikboot nog nie tuis gerapporteer het nie en as vermis aangegee word. 'n Reuse ondersoek is geloods maar op die 5de Junie is aanvaar dat die Scorpion verlore is saam met sy bemanning van 99.
Teen die einde van Oktober 1968 is die romp van die Scorpion deur 'n Amerikaanse Vloot oseaniese navorsingskip opgespoor op 'n diepte van 3 048 m ongeveer 644 km vanaf die Asore. Alhoewel die duikboot gesink het na die instelling van die SubSafe-program van die Amerikaanse Vloot was die Scorpion nooit gesertifiseer as deel van die program nie. Daar kon nooit vasgestel word wat die duikboot laat sink het nie alhoewel daar 'n paar teorieë bestaan.
Bron
wysig- The Illustrated Encyclopedia Of Destroyers Frigates & Submarines, Bernard Ireland en John Parker, 2015, ISBN 978-0-85723-601-2