Van der Hum

Van der Hum is die unieke Kaapse likeur met ‘n nartjieagtige geur. Dit het saam met Constantiawyn wêreldberoemd geword.

Die bestanddele van hierdie likeur is naeltjies, neutmuskaat, gemaalde kaneel, gedroogde nartjieskil, brandewyn, geel suiker en water. Dikwels is kruiebrandewyn gebruik en selfs ‘n kelkie rum bygevoeg. Goedverouderde brandewyn is by voorkeur gebruik om ‘n produk van ’n hoë gehalte daar te stel. Baie ou Kaapse families het hul eie geheime resep gehad.

Presies hoe dit die eerste keer ontstaan het, is nie bekend nie. Vermoedelik wou iemand aan die Kaap die bekende Nederlandse likeur bekend as curaçao (Blou Curaçao) maak, maar het in die proses nartjieskil in plaas van lemoenskil gebruik. Die oorsprong van die naam Van der Hum is ook onseker.

Lees ook

• Karrie
• Skokiaan
• Vaaljapie

Bibliografie

• De Villiers, Anna: Ons Huisvlyt. Johannesburg: Suid-Afrikaanse Uitsaaikorporasie, 1966.
• Opperman, D.J. (red.): Gees van die wingerd. Kaapstad: Human & Rousseau, 1968.
• www.food24.com