Vlag van Honduras

Die nasionale vlag van Honduras is op 9 Januarie 1866 amptelik in gebruik geneem. Die vlag vertoon drie ewe wye horisontale bane in (van bo na onder) blou, wit en blou met vyf blou vyfpuntige sterre in die wit baan.

Vlag van Honduras

Vlag van Honduras
Gebruik	Nasionale vlag en Burgerlike- en Staatsvaandel
Verhouding	1:2
Goedgekeur	9 Januarie 1866
Ontwerp	Drie horisontale bane in blou, wit en blou met vyf blou sterre in die middel van die wit baan.
Wisselvormvlag van Honduras
Gebruik	Vlootvaandel
Verhouding	1:2
Ontwerp	Drie horisontale bane in blou, wit en blou met die landswapen in die middel van die wit baan.

Simboliek

Wapperende vlag van Honduras

Honduras het van 1823 tot die burgeroorlog van 1838–1840 deel uitgemaak van die Verenigde State van Sentraal-Amerika, wat van 1825 bekend gestaan het as die Federale Republiek van Sentraal-Amerika. Net soos Costa Rica, El Salvador, Guatemala en Nicaragua het Honduras sy vlag gebaseer op die vlag van die Federale Republiek van Sentraal-Amerika.

Die twee blou bane stel die Stille- en Atlantiese Oseane voor waartussen Honduras lê. Die wit baan stel die land tussen die oseane voor en die vyf sterre simboliseer die vyf lande wat ontstaan het uit die Federale Republiek van Sentraal-Amerika.

Die huidige vorm en kleurvasstelling van die vlag is eers op 18 Januarie 1949 vasgelê. Tot hierdie datum was daar verskeie alternatiewe vlae waarin die sterre in ander pantone gerangskik is of waar die kleur van die sterre geel in plaas van blou was.

Ontwerp

Die drie horisontale bane is elk ewe hoog en neem dus een derde van die vlag in beslag. Die blou in die boonste en onderste bane word amptelik beskryf as azul turquesa (donker blou).

Die vyf vyfpuntige sterre is in ’n X-patroon waarvan die middelste ster presies in die middel van die vlag is. Die middel van die twee linkerste sterre is een derde van die vlagpaalkant af en die middel van die twee regterste sterre is een derde van die wapperkant van die vlag af.

Ander vlae

• 
  Vlag van die Federale Republiek van Sentraal-Amerika, 5 Maart 1824 tot 22 November 1824
• 
  Vlag van die Federale Republiek van Sentraal-Amerika, 22 November 1824 tot 28 April 1865
• 
  Vlag van Honduras vanaf 16 Februarie 1866
• 
  Vlag van Honduras vanaf 16 Februarie 1866
• 
  Vlag van Honduras vanaf 16 Februarie 1866
• 
  Oorlogsvaandel van Honduras vanaf 16 Februarie 1866
• 
  Vlag van die Groter Republiek van Sentraal-Amerika, 2 November 1898 tot 30 November 1898
• 
  Vlag van Honduras in 1898
• 
  Vlag van Honduras vanaf 27 September 1933

Geskiedenis

Vlae van die Federale Republiek van Sentraal-Amerika

Die hoofartikel vir hierdie afdeling is: Federale Republiek van Sentraal-Amerika.

Die vlag van Honduras, soos reeds genoem, is gebaseer op die vlag van die Federale Republiek van Sentraal-Amerika, wat op sy beurt gebaseer is op die vlag van Argentinië. Hierdie vlag het uit drie horisontale bane in blou, wit en blou bestaan met die wapen van die Verenigde State in die middel van die wit baan. In die periode van die bestaan van die federasie het hierdie vlag gedien as nasionale vlag van Honduras maar ook as die deelstaatvlag. Hierdie vlag kan dus gesien word as die eerste Honduraanse vlag.

Die ander lande wat uit die federasie ontstaan het (Costa Rica, El Salvador, Guatemala en Nicaragua) het ook hul vlae op die vlag van die Federale Republiek van Sentraal-Amerika gebaseer. Die vlae van hierdie lande bestaan ook uit die kleurkombinasie van blou-wit-blou; Costa Rica het ’n rooi baan bygevoeg en die vlag van Guatemala bestaan uit drie vertikale bane.

Vlae van die onafhanklike Honduras

Toe Honduras hom in 1838 onafhanklik verklaar het, het die vlag van die Federale Republiek van Sentraal-Amerika as nasionale vlag in gebruik gebly. In 1851 het Honduras saamgewerk aan die stigting van ’n nuwe Sentraal-Amerikaanse federasie. Hierdie federasie het nie lank staande gebly nie maar het wel ’n nuwe vlag gehad wat gebaseer was op die ou Sentraal-Amerikaanse vlag. Aangesien dit nie waarskynlik is dat die vlag van 1851 in ’n kort tyd wyd aanvaar is nie, is die ou vlag waarskynlik gebruik tot 16 Februarie 1866 toe die eerste egte Honduraanse vlag aanvaar is.

Daar is geen duidelikheid oor hoe die vlag van 1866 presies daar uitgesien het. Dit is wel duidelik dat die vlag, net soos sy voorgangers, uit drie horisontale bane in blou, wit en blou bestaan het en dat daar vyf blou sterre in die wit baan was. Volgens sommige bronne was die posisie dieselfde as die huidige vlag, maar na benede gepunt; ander bronne stel dit dat die sterre in ’n halfsirkel verskyn het. Die oorlogsvaandel het die toenmalige Honduraanse wapen vertoon met vyf sterre daaronder.

In 1895 het aan die lig gekom dat Honduras saam met Nicaragua en El Salvador die Republiek van Sentraal-Amerika sou stig; weer ’n poging om die Sentraal-Amerikaanse state te verenig. Aangesien die vlag van die Republiek goue sterre bevat het, is die Honduraanse vlag dikwels met goue sterre uitgebeeld sonder dat daar wetlike voorskrifte daarvoor was.

In 1933 is die ontwerpbesonderhede van die vlag effens aangepas; dieselfde het in 1949 gebeur en sedertdien is daar nog nie weer aan die vlag verander nie.

Eksterne skakels

• (en) Honduras by Flags of the World.
• (en) "Flag of Honduras". Encyclopædia Britannica. Besoek op 22 Mei 2019.

Hierdie artikel is in sy geheel of gedeeltelik vanuit die Nederlandse Wikipedia vertaal.