Wally Hayward

Wallace ("Wally") Henry Hayward (10 Julie 1908 – 28 April 2006) was 'n Suid-Afrikaanse atleet met 'n 60 jare lange loopbaan. Hy het die Comrades-maraton vyf keer gewen en dié afstand van 90 kilometers vir die laaste keer net voor sy tagtigste verjaarsdag voltooi.

Hy is in Johannesburg gebore en oorlede. Hy is in 2006 op 97-jarige ouderdom, enkele dae voor die jaarlikse Wally Hayward-marathon wat na hom vernoem is, oorlede.

Comrades-maraton

Hayward wen die Comrades-maraton tydens sy eerste probeerslag in 1930 op 21 jarige ouderdom (die jongste atleet op daardie stadium). Eers twintig jaar later neem hy weer deel en wen dit vanaf 1950 tot 1954, behalwe in 1952 toe hy verkies het om eerder Suid-Afrika tydens die 1952-Olimpiese Somerspele in Helsinki te verteenwoordig. Hy eindig in die tiende plek tydens die Olimpiese marathon-byeenkoms.

In 1951 en 1953 breek hy die afdraande-rekord (die eerste atleet onder 6 uur), en in 1954 breek hy die opdraande-rekord en word so op 45-jarige ouderdom die oudste man om die wedloop te wen (die rekord is later deur Vladimir Kotov in 2004 gebreek).

In 1988 keer hy terug om weer aan die Comrades deel te neem. Hy voltooi dit vinniger as die helfte van die hardlopers met 'n tyd van 9h44m. Wally sorg vir 'n dramatiese einde in 1989, die daaropvolgende jaar, toe hy afdraande-wedloop op die ouderdom van 80 voltooi. Daar was skaars 'n droë oog in die stadion toe hy in 'n ooglopende swak toestand oor die wenlyn strompel, slegs 1 minute en 57 sekondes voor die afsnytyd, waarna hy sy skoene permanent ophang. Tot vandag hou hy die rekord vir die oudste persoon om die Comrades-maraton te voltooi.

Ander prestasies

In 1953 breek hy rekords in die London to Brighton Marathon, die Bath to London 100-miler en die 24-hour track race.

Tydens die Statebondspele in 1938 wen hy die brons medalje in die 6 kilometer kompetisie in Sydney. In die 3 myl kompetisie geëindig hy vierde.

Hayward het tydens die Tweede Wêreldoorlog in Noord-Afrika en Italië geveg en het in 1942 die British Empire Medal vir dapperheid vir sy optrede by El Alamein in Egipte verdien.

Familie

Hy is in Desember 1934 met Gladys Catto getroud. Een dogter, Gwenolyn, is in Oktober 1935 uit die huwelik gebore. In 1957 skei Wally en Gladys, waarna hy in 1971 met sy tweede vrou, Bertha Bland getroud is.

Omstredenheid

In 1953 het hy 'n klein donasie vir reiskostes aanvaar terwyl hy in Brittanje gekompeteer het. Derhalwe verklaar die Suid-Afrikaanse Atletiek en Fietsry Assosiasie hom as 'n professionele atleet, en plaas 'n verbod op sy deelname aan amateur wedlope. Die verbod is uiteindelik in 1974 opgehef.