Wedvaart om die Eiland

Die Wedvaart om die Eiland (Vaaldam) is die grootste binnelandse wedvaart in die wêreld. Tot 700 seiljagte van alle groottes en vorm neem deel aan hierdie jaarlikse wedvaart op die Vaaldam. Hierdie regatta word georganiseer deur die Deneys-meer Seiljagklub in Deneysville in die Vrystaat.

Die seiljagwedvaart het 1958 begin toe die bemannings van die BOAC (British Overseas Aircraft Corporation) se Catalina-vliegbote by die seiljagklub gestasioneer was. Destyds was die Vaaldam 'n internasionale lughawe. Verveeld gedurende die lang poses tussen vlugte, het 'n bemanningslid 'n kollega uitgedaag vir 'n wedvaart om die Grooteiland in die Vaaldam. In die eerste Wedvaart om die Eiland het hulle mekaar in seilskuite die stryd aangesê.

Die roete begin en eindig by Deneysmeerseiljagklub en is sowat 24 seemyl lank. Die meeste inskrywings nog vir die wedvaart was 721 seiljagte in 1986 gewees. Die vinnigste tyd vir hierdie 24 seemyl wedvaart is in 2007 opgestel deur Danie Colyn en hy het die wedvaart in 55 minute en 35 sekondes voltooi. Die vorige rekord tyd vir die wedvaart was deur Eric Cook en sy dogter, Julie opgestel en was 1 uur, 1 minuut en 27 sekondes wat reeds in 1998 opgestel was.

In 2007 was die resies aangeteken in die Guinness Boek van Rekords as die grootste binnelandse seiljagwedvaart met 379 seiljagte wat die wedvaart voltooi het.