Wikipedia:Skakel
'n Skakel is 'n stukkie teks (of miskien 'n prentjie) wat mens na 'n ander artikel neem as mens daarop klik. Skakels is wat afsonderlike bladsye in Wikipedia (en inderdaad die WWW) aan mekaar verbind. As sodanig is dit dus duidelik dat die oordeelkundige gebruik van skakels belangrik is vir ons. Vir volledige inligting aangaande skakels, sien gerus die Engelse bladsy daaroor.
Hoeveel skakels? wysig
Die keuse van watter teks as skakels gemerk word, berus by elke bydraer. Te min skakels maak Wikipedia minder samehangend en verlaag die kans dat iemand sal bly omdat 'n verwante artikel interessant lyk. Rooi skakels (skakels na artikels wat nog nie bestaan nie) moedig ook bydraers aan om iets te skryf sodat die skakel wel na 'n artikel wys.
Omdat skakels egter anders vertoon as ander teks, bemoeilik dit waarskynlik lees so effens. Iets soos "Hansie slim berg wil klim" is natuurlik nie sinvol nie. Besluit watter skakels in die konteks van die artikel vir 'n leser nuttig of interessant sal wees, en merk die eerste voorkoms van die term (of verwante verbuiging) as 'n skakel deur dit as volg te merk:
[[skakelnaam]]
Onthou dat iemand wat u teks lees, waarskynlik 'n artikel sal skep by die naam wat u merk. Hou dus die Titelriglyne in gedagte.
In baie lang artikels kan dit dalk ook sinvol wees om 'n skakel by 'n latere voorkoms van 'n term te gebruik, sodat iemand nie te ver hoef terug te soek om die skakel te vind nie. Die gebruik van skakels in die vetgedrukte titel in die inleidingsin, bemoeilik waarskynlik lees, en so 'n skakel moet eerder uitgestel word indien moontlik.
Skakels moenie verras nie wysig
Die doel van skakels is om verwante inligting eksplisiet met mekaar te verbind. Onsamehangende of onduidelike verbande is dus nie baie nuttig nie. Aangesien die vertoonde teks nie noodwendig ooreenstem met dit waarheen geskakel word nie, kan misleidende skakels maklik geskep word. Iets soos
Die krieketspeler [[ouderdom|tree af]].
vertoon as tree af, maar skakel na ouderdom en sal moontlik 'n leser teleurstel. Iets soos
Die krieketspeler [[aftrede|tree af]].
mag (afhangend van die konteks en omstandighede) dalk wel nuttig wees.
Vermy die gebruik van meer as een skakel in 'n samestelling, aangesien 'n leser moontlik nie sal sien dat dit na twee afsonderlike artikels wys nie. Kies eerder die teiken dat dit pas by die hoofdeel van die samestelling en/of verwys na die aparte sake elders in die sin. Gebruik gesonde oordeel.
Onthou gerus: Voel vry en gaan jou gang