Wikipedia:Voel vry en gaan jou gang

Hallo en welkom, dis wonderlik dat jy ook van plan is om mee te werk aan hierdie gemeenskaplike projek vir die skepping van die grootste Afrikaanse vryelik-toeganklike ensiklopedie! Hierdie bladsye gee vir jou die basiese inligting oor die doelstelling en leuse van Wikipedia: Neem vrymoedigheid en gaan jou gang.

Voel vry

Wiki's werk baie goed as mense vrymoedigheid neem.

Dink rustig daaroor: Bewerk gerus die bladsye wat jou interesseer, verbeter foute, voeg inligting by (met bonne asb.), verbeter die styl van 'n artikel, begin 'n nuwe onderwerp, ensovoorts. Dis alles welkom! Jy doen daardeur niks verkeerd nie; inteendeel, so bou ons almal saam, elkeen op sy eie manier, verder aan hierdie projek.

Moenie jou te lank afvra hoekom niemand anders dit nog nie verbeter het nie, neem gewoon vrymoedigheid om dit self te doen. Met die nodige beleefdheid en goeie maniere gaan dit alles goed, sal jy binnekort sien.

Moenie besorg wees nie

Goed, begryp jy nog nie heeltemal nie? Kom ek stel dit duideliker: as iemand 'n artikel skryf wat heeltemal onsinnig of laf, of gewoon verkeerd is, moenie besorg wees oor die persoon se gevoelens nie. Korrigeer of voeg beter inhoud daarby, of as daar geen ander uitweg is nie, vervang desnoods die hele geskrif met jou eie briljante (tersaaklike) prosa.

Omdat alle vorige weergawes van elke artikel altyd beskikbaar is deur middel van die ouer weergawes (Wys geskiedenis) -skakel bo-aan die blad, is dit vir enigiemand altyd moontlik om verwyderde teks terug te plaas, of dit ten minste te bekyk. Moet dus nie te lank huiwer om veranderings aan te bring nie. Die lys van onlangse veranderings is ook vir almal sigbaar, en as jy te drastiese veranderings deurvoer, is daar deurgaans iemand wat dit sal raaksien en korrigeer.

Die bronnemateriaal en bespreking van elke artikel is die plek waar jy met ander wikipediane gedagtes kan wissel oor die artikel. In die geval van inhoudelike veranderings kan jy opmerkings daaroor laat, maar neem vrymoedigheid om die opmerkings uit te los eerder as om niks te verander nie; meestal is een opmerking in die 'opsomming'-veld voldoende. Wanneer iemand nie saamstem met jou wysigings nie, sal jy dit opmerk, meestal in die vorm van 'n verandering van jou verandering en/of 'n vraag op die besprekingsblad. Julle kan dan daar oorleg pleeg oor hoe om die meningsverskil op te los.

Dít is die vryheid van 'n Wiki. Miskien het jy nou genoeg selfvertroue om jou gang te gaan? In die "Instruksies" kan jy meer lees.

Ons werk sáám

Die meeste outeurs het instinktief die neiging om hul pennevrug as hul eiendom te beskou. Maar hierdie houding werk téén jou op Wikipedia: wat veel beter werk, is om die emosionele band met jou bydrae te laat vaar sodat die artikel verbeter kan word.

Natuurlik is dit ook so dat jy in goeddeurdagte artikels waaraan hard gewerk is nie sommer wild tekere kan gaan nie. Groot lappe teks verwyder jy uiteraard net in oorleg met andere bydraers: daar is die kwessie van goeie omgang met mekaar.

Maar verbeter en toevoeg, sinne of paragrawe herskryf, as dit die artikel kwalitatief verbeter: gaan jou gang. As dit 'n reuseverandering is, maak gerus 'n samevatting op die besprekingsblad waarin jy uitlê wat en waarom.

Moenie stil en hardkoppig (of ten minste sonder goeie oorleg) oor en weer aan dieselfde stukke verander asof dit 'n wedstryd is om te kyk wie die langste kan aanhou nie. Ons noem dit hier 'n wysigingsoorlog, en hierdie soort geveg kos net 'n klomp energie en lok min waardering uit; samewerking tot by 'n oplossing is die ideaal.

As jy een verandering in 'n rits artikels wil deurvoer, wel gedaan. Maar wees versigtig en hou rekening met die kommentaar van andere: 'n bietjie oorleg voor die tyd kan wondere doen ...

Watter Afrikaans?

Iedereen wat Afrikaans praat, moet hier tuis kan voel, waar hy of sy ook al vandaan kom. Dit beteken byvoorbeeld dat ons mekaar nie deurentyd teregwys oor "tipiese" Kaapse of "tipiese" Transvaalse uitdrukkings of spelling nie. Probeer sover moontlik goeie Standaardafrikaans gebruik. Vermy dit, as jy kan, om 'n streekspesifieke uitdrukking te gebruik. Laat ons eerder streef na helderheid en duidelikheid.

As jy teks meer neutrale Afrikaans wil maak, gaan jou gang. As die oorspronklike outeur nie met die verandering eens is nie, kan dié dit dan duidelik maak of die oorspronklike teks herstel. Moenie in 'n nuttelose debat daaroor verval nie: goeie oorleg is die sleutel.

Wel, wat van konvensies?

Neem vrymoedigheid en gaan jou gang beteken ook nie dat alle veranderings of nuwe artikels vir die wikipedia-gemeenskap aanvaarbaar sal wees nie. Gaan jou gang, maak nuwe artikels, verander bestaande artikels, maar aanvaar dat jou veranderings miskien weer omgekeer kan word, of jou artikel op die lys vir verwydering kan kom.

Oor 'n paar sake is dinge duidelik. As jy byvoorbeeld hou by die konvensies behoort andere nie jou verkeerde artikel te verander nie.

As jy 'n artikel skep oor 'n onderwerp wat geen plek in 'n gewone ensiklopedie sou hê nie, lees eers die "Aanvaardingsbeleid". Maar in ieder geval, gaan gewoon jou gang as jy 'n artikel wil skep. As jou artikel ná 'n paar dae nog nie genomineer is vir verwydering nie, dan lyk dit goed. As dit wel genomineer is, probeer dan jou artikel in ooreenstemming met die Aanvaardingsbeleid kry.

As jy 'n artikel aantref wat jy van onvoldoende ensiklopediese gehalte beskou en waarin selfs die potensiaal van uitbreiding te klein is, nomineer die bladsy op die lys vir verwydering asook die rede waarom jy voel die blad moet verdwyn. Neem ook die vrymoedigheid (met voldoende argumente) om beswaar te maak teen enige verwyderingsnominasie.

Wat as die ellelange besprekings of negatiwiteit op die besprekingsblaaie jou pla?

In beginsel kan jy aan Wikipedia meewerk sonder om enige besprekingsblaaie te lees. Jy kan net so goed regstellings doen, aanvullings tot artikels maak, nuwe artikels skep, ensovoorts.

Hou wel rekening daarmee, dat dit 'n negatiewe indruk skep indien jy vrae of opmerkings van andere op die besprekingsblaaie of jou besprekingsblad ignoreer.

Jy loop ook 'n groter kans dat jou werk ongedaan gemaak kan word as die redes vir die ongedaanmaking op die besprekingsblad verklaar word.