William Campbell-meubelmuseum

Die William Campbell-meubelversameling van die Universiteit van KwaZulu-Natal in Durban bestaan oorwegend uit meubels wat in die pionierstyd in Natal gebruik is.

Meubels

Uitstaande items is die stinkhoutrusbanke en -stoele uit die 18de en 19de eeu, kaste uit dieselfde periode met die oorspronklike silwerbeslag, ‘n kiaat- en geelhoutkas en stinkhoutklaptafels met ysterbeslag. By die meubels is ‘n stoel en Bybel gebruik deur Daniel Lindley en ‘n stoel gemaak deur Dinuzulu op St. Helena. Verskeie konfore en ‘n brandewynstookketel is te besigtig.

Breekware

Borde uit ‘n 19de eeuse Sevres-eetstel is versier met handgeskilderde tonele. Uit die 18de eeu is daar ook ‘n Chinese keramiekvaas. Skerwe van Ming-porselein uit die periode 1360 tot 1440 is waarskynlik afkomstig van skepe wat langs die kus van Pondoland vergaan het.

Horlosies

‘n Goue sakhorlosie deur Winston Churchill geskenk aan Charles Burnham as dank vir sy hulp met Churchill se ontsnapping herinner ons aan die Tweede Vryheidsoorlog.

Skilderye

Die groot versameling olie- en waterverfskilderye deur ‘n wye verskeidenheid kunstenaars beeld hoofsaaklik tonele in die vroeëre Natal en Zoeloeland uit. Daar is waterverfskilderye deur Thomas Baines en Thomas William Bowler, etse deur Nita Spilhaus en Tinus de Jongh, met die hand gekleurde akwatinte deur William John Burchell en litografieë deur William Cornwallis Harris.

Naam

Die versameling dra die naam van die suikermangaat William Alfred Campbell (1880-1962), die oudste seun van die sakeman en politikus Marshall Campbell en broer van Killie Campbell. William Campbell het in 1955 sy ouerhuis Muckleneuk, waarin die versameling uitgestal word, aan die stad Durban geskenk.

Lees ook

• Campbell-versamelings
• Killie Campbell-Africana-biblioteek
• Mashu-etnologiemuseum

Bibliografie

• Duggan, J.F.: Killie Campbell se weergalose kultuurnalatenskap. In: Lantern. Tydskrif vir Kennis en Kultuur. Jaargang 13, nr. 3, Maart 1974.
• phambo.wiser.org.za
• web.archive.org