Yankee-klas duikboot
| Subklas van | ballistiese missiel duikboot, kern-aangedrewe duikboot |
|---|---|
| Kort naam | Yankee |
| NAVO-kodenaam | Yankee I |
| Voorafgegaan deur | Hotel-klas duikboot |
| Opgevolg deur | Delta-klas duikboot |
| Land van oorsprong | Sowjetunie |
| Operateur | Sowjet Vloot, Russiese Vloot |
| Ontwerper | Abram Samoeilovitsj Kassatsier |
Die Yankee-klas duikboot is 'n klas kernaangedrewe duikbote van die Russiese Vloot wat ballistiese missiele kan dra. Dit is die eerste Russiese duikboot wat oor slaankrag beskik wat vergelykbaar is met dié van die Amerikaanse Vloot. Die ontwikkeling van die duikboot staan as projek 667A bekend in die Sowjetunie.
Daar is baie aandag aan die duikboot se kontoerlyne geskenk om onderwaterweerstand tot 'n minimum te beperk en ook duikbootruis te verminder. 'n Nuwe skroef is ontwerp om ruis te verminder. Die drukromp is bedek met klankabsorberende rubber.
Die duikbote is aanvanklik toegerus met die Sowjet D-5 lanseerstelsel vir sestien R-27 missiele. Hierdie missiele het 'n togafstand van 2 400 km gehad. Hulle is in kompartemente twee en vyf in die tien-kompartementduikboot geplaas. Die missiele kan vanaf 'n diepte van 50 m gelanseer word. Hulle kan in vier sarsies afgevuur word, vier op 'n slag met 'n agt sekonde tydsverloop tussen elke missiel.
Die eerste vier Yankee's was toegerus met die Sigma-navigasiestelsel en die res met die Tobol-stelsel, die eerste Sowjet navigasie stelsel wat satellietnavigasie gebruik. Hierdie stelsel het homself bewys in die Arktiese gebiede. Die eerste 667A duikboot het sy toetstydperk in 1967 voltooi en die duikbote was vanaf 1967 tot 1974 in diens gestel in die Noordelike Vloot. Daar was altesaam 34 van die duikbote gebou. Die eerste klompie duikbote is almal met die D-5U lanseer stelsel en R-27U missiele opgeradeer in die laat 1970's en vroeë 1980's. Die verbeterde missiel het 'n togafstand van 3 000 km.
Die Yankee-duikbote is eerste by die 31ste Divisie van Sowjet Strategiese Duikbote van die Noordelike Vloot in diens gestel te Sayda en later ook by die 19de Divisie.
Op 6 Oktober 1986 het een van die Yankee-duikbote die nuus gehaal toe K-219 'n ontploffing aanboord gehad het waarin vier bemanningslede gesterf het. Daar was aanvanklik gepoog om die duikboot op sleeptou te neem maar dit is laat vaar en hy is deur sy bemanning laat sink in water wat 5 500 m diep is. Daar was sprake van 'n botsing met 'n Amerikaanse duikboot maar dit is deur Amerika ontken.
Die duikbote is een-vir-een uit diens gestel vanaf 1985 tot 1994.
Tegniese besonderhede
wysig| Item | Statistiek |
|---|---|
| Verplasing (oppervlak) | 7 760 metrieke ton |
| Verplasing (onderwater) | 9 600 metrieke ton |
| Lengte | 132 m |
| Breedte | 11,6 m |
| Aandrywing | 2 x Hoëdrukwaterreaktors 2 x stoomturbines van 38 776,4 kW |
| Spoed (oppervlak) | 12,0 knope |
| Spoed (onderwater) | 25,0 knope |
| Bemanning | 140 persone |
| Wapens | 4 x 533 mm torpedobuise 667A:D-5 lanseerstelsel met 16xR-27 missiele 667AU:D-5U lanseerstelsel met 16xR-27U missiele |
Bron
wysig- The Illustrated Encyclopedia Of Destroyers Frigates & Submarines, Bernard Ireland en John Parker, 2015, ISBN 978-0-85723-601-2