Moses Sithole
Moses Sithole (geb. 17 November 1964) is ’n Suid-Afrikaanse reeksmoordenaar en verkragter wat die sogenaamde ABC-moorde gepleeg het.[1] Dit is so genoem omdat hulle in Atteridgeville begin en daarna na Boksburg en Cleveland, ’n voorstad van Johannesburg, uitgebrei het. Sithole is daarom ook die ABC-moordenaar genoem, asook die South African Strangler.
| Moses Sithole | ||
| Gebore | 17 November 1964 | |
| Land | Suid-Afrika | |
| Bynaam | ABC-moordenaar South African Strangler Gauteng-moordenaar | |
| Misdaad | Reeks moorde, verkragtings | |
| Misdaadbesonderhede | ||
| Plek | Gauteng | |
| Datum(s) | 1994–1995 | |
| Slagoffers | 38+ | |
| Metode | Verwurging met slagoffers se onderklere | |
| Vonnisbesonderhede | ||
| Aangekeer | Augustus 1995 | |
| Vonnis | 2 410 jaar | |
Vroeë lewe
wysigHy is in Vosloorus, ’n arm deel van Boksburg, Gauteng, gebore. Sy pa is dood toe hy vyf jaar oud was en sy ma het die gesin alleen gelaat.[2] Sithole en sy sibbes het die volgende drie jaar in ’n weeshuis grootgeword waar hulle volgens hom sleg behandel is. Daar is nie veel van sy lewe bekend nie, behalwe wat hy self vertel het. Volgens hom is hy in sy tienerjare vir verkragting in hegtenis geneem en was hy daarna sewe jaar in die tronk.[2] Hy het later sy tyd in die tronk die skuld daarvoor gegee dat hy ’n moordenaar geword het. Hy het gesê die vroue wat hy vermoor het, het hom almal herinner aan dié wat hom baie jare tevore "vals beskuldig" het van verkragting.[2]
Moorde
wysigTen tye van die moorde het Sithole ’n vals organisasie, Youth Against Human Abuse, gehad wat oënskynlik misdaad teen kinders beveg het. Al sy slagoffers is vroue met wie hy onderhoude gevoer het vir posisies in die "welsynorganisasie". Hy het hulle na afgeleë dele geneem en hulle dan geslaan, verkrag en vermoor. Hulle is gewoonlik met hul eie onderklere verwurg.[2] Hy sou die woord "bitch" op hul lyke skryf.[2] Die eerste moorde het in die township Atteridgeville naby Pretoria plaasgevind.
Ná ’n ruk het Sithole sy dade in Boksburg voortgesit en toe in Cleveland. Teen 1995 het hy beweer hy het meer as 30 vroue vermoor. In sommige gevalle het hy daarna die slagoffer se familie gebel, blykbaar net om hulle te tart.[3] Die destydse president, Nelson Mandela, het Boksburg in ’n stadium besoek om die publiek se hulp te vra om die moordenaar aan te keer.[2]
Arres en vonnis
wysigIn Augustus 1995 is iemand wat saam met een van die slagoffers gesien is, as Sithole geëien. Die SAPD-ondersoekers het gou besonderhede oor sy vorige vonnis vir verkragting bekend gemaak. Sithole het net daarna verdwyn. In Oktober 1995 het hy Tamsen de Beer, ’n joernalis by die Johannesburgse dagblad The Star gekontak en gesê hy is die moordenaar.[4][2] Tydens ’n telefoongesprek met De Beer het hy gesê hy het die moorde gepleeg uit wraak vir sy "onregverdige tronkstraf". Hy het toe gesê hy het 76 vroue vermoor, twee keer soveel as wat vroeër berig is. Uiteindelik, om te bewys hy is die moordenaar, het hy aanwysings gegee na waar hy een van die lyke gelos het.[5]
Sithole is eindelik in Johannesburg opgespoor en in hegtenis geneem. Die polisie het hom in die maag, arm en voet geskiet[6] toe hy ’n konstabel met ’n byl aanval. Hy is daarna hospitaal toe geneem, waar hy positief vir MIV getoets het.[2][7][8]
Op 5 Desember 1997 is Sithole gevonnis tot 50 jaar tronkstraf vir elk van die 38 moorde, 12 jaar vir elk van 40 verkragtings en vyf jaar vir elk van ses diefstalaanklagte. Aangesien hy dit agtereenvolgens moet uitdien, is hy effektief tot 2 410 jaar tronkstraf gevonnis. Regter David Carstairs het gelas Sithole moet minstens 930 jaar daarvan uitdien voordat hy in aanmerking kan kom vir parool. Hy is aanvanklik in die C-Max-maksimumsekuriteitsafdeling van die Pretoria Sentraal-gevangenis aangehou en is nou in die Manguang-gevangenis in Bloemfontein in die Vrystaat.
Sien ook
wysigVerwysings
wysig- ↑ Kendal, Rebekah (3 Mei 2007). "Worst criminals of SA". iafrica.com. Geargiveer vanaf die oorspronklike op 12 Junie 2018. Besoek op 3 Januarie 2011.
- ↑ 2,0 2,1 2,2 2,3 2,4 2,5 2,6 2,7 Greig, Charlotte (2005). Evil Serial Killers: In the Minds of Monsters. New York: Barnes & Noble. p. 176. ISBN 0-7607-7566-4.
- ↑ A&E Biography – Moses Sithole
- ↑ Beeld, 1 November 1996. "Stem in opname van oproep Sithole s'n, getuig verslaggewer". URL besoek op 26 Oktober 2014
- ↑ Greig, Charlotte (2005). Evil Serial Killers: In the Minds of Monsters. New York: Barnes & Noble. p. 177. ISBN 0-7607-7566-4.
- ↑ Beeld, 3 November 1995. "Vermeende reeksmoordenaar dalk gou tronk toe". URL besoek op 26 Oktober 2014
- ↑ Beeld, 28 November 1995. "Sithole glo besmet met die HI-virus". URL besoek op 26 Oktober 2014
- ↑ "South African Strangler: Moses Sithole". Notorious (The Biography Channel). Archived from the original on 28 Maart 2014. https://web.archive.org/web/20140328045659/http://www.biography.com/tv/notorious/episodes/south-african-strangler. Besoek op 26 Oktober 2014.
Bronne
wysig- Newton, Michael (2000). The Encyclopedia of Serial Killers. New York: Checkmark Books. p. 207. ISBN 0-8160-3979-8.
- Ströhm, Martin. "Graveyard". Crime Library. Besoek op 26 Oktober 2008.
- von Nekerk, Philip (Oktober 2000). "A Time to Kill". Maxim. maximonline.com.
Hierdie artikel is merendeels vertaal uit die Engelse Wikipedia
