Afrikaans 100-projek

Die Afrikaans 100-projek verwys na ‘n oop inisiatief om die 100 jarige bestaan van Afrikaans as amptelike taal te herdenk. Afrikaanse organisasies, instansies, maatskappye, skole en individue wat Afrikaans as inheemse taal steun, kan by die Afrikaans 100-projek betrokke raak deur hul eie inisiatiewe van stapel te stuur om dit te vier. Die projek word beplan om van 2024 tot 8 Mei 2025 te duur en word afgesluit met ‘n groot gesamentlike feesgeleentheid wat by die Afrikaanse Taalmuseum en Taalmonument in die Paarl gehou sal word.

Agtergrond

Hoewel Afrikaans reeds in die sewentiende eeu begin wortel skiet het met die taal se oorsprong uit Europa, Afrika en die Ooste, was dit eers op 8 Mei 1925 as amptelike taal erken. Dit nasat die Wet op Amptelike Tale van Suid-Afrika, Wet 8 van 1925, deur die destydse volksraad aanvaar is en waarvolgens Afrikaans, naas Engels, ’n amptelike taal van Suid-Afrika erken is.

Beplanning

Die oorsigkomitee van Afrikaans 100, met Theuns Eloff (Voorsitter: Dagbreektrust) as voorsitter en Michael Jonas (Direkteur: Afrikaanse Taalmuseum- en Monument, Paarl) as ondervoorsitter, aan die stuur, is in 2023 gevestig. Ander persone op die komitee is Astrid de Vos, Diana Ferrus, Werner Human, Susan Lombaard, Karen Meiring, Sinki Mlambo, Hendrik Theys, Merlyn van der Rheede en Heindrich Wyngaard met Conrad Steenkamp en Ria Olivier as die sekretariaat.

Giep van Zyl, voormalige hoof van Aardklop, is in September 2023 aangestel as die Nasionale Koördineerder, met René Arendse, ’n motiveringspreker en opleier van veral vroue-entrepreneurs, wat as Nasionale Adjunk-koördineerder aangestel is.