Afrikaanse Hoër Meisieskool
Die Afrikaanse Hoër Meisieskool is 'n openbare hoërskool vir meisies in Pretoria, Gauteng, Suid-Afrika met Afrikaans as die primêre onderrigtaal. Die skool is die susterskool van die Afrikaanse Hoër Seunskool.
| Afrikaanse Hoër Meisieskool Pretoria | |
| Leuse | Ek sien haar wen[1] |
|---|---|
| Gestig | 28 Januarie 1920 |
| Tipe | Staatskool |
| Hoof | Juf Marna Jordaan |
| Adjunkhoof(de) | Me. J.I. Troskie Me. D. Heyns |
| Stigter | Jan Joubert en Chris Neethling |
| Personeel | 100 |
| Leerlinge | 1200+ |
| Grade | 8-12 |
| Adres | Bondstraat, Clydesdale, |
| Stad | Pretoria |
| Provinsie | Gauteng |
| Land | Suid-Afrika |
| Kleure | |
| Koshuis(e) | Huis Steijn |
| Skoolkoerant | Stroom-op |
| Webblad | http://www.ahmp.co.za |
Geskiedenis
wysigStigting
wysigDie geskiedenis van die Afrikaanse Hoër Seunskool en die Afrikaanse Hoër Meisieskool is nou verweef met die belangrikste groeitydperk van die Afrikaner en sy taal. Dié twee skole het in 1930 ontstaan ná die verdeling van Pretoria se eerste Afrikaanse hoërskool wat in 1920 in die eertydse woning van Generaal Piet Joubert by Visagiestraat 218 gestig is.
Wanneer die tydsomstandighede in ag geneem word, is die stigting van 'n Afrikaansmedium- hoërskool in 1920 in Pretoria – vyf jaar vóór die erkenning van Afrikaans as amptelike taal - ’n unieke gebeurtenis.
Die eerste jaar, 1920
wysigDie eerste jaar het ’n aanvang met 44 leerlinge en drie onderwysers geneem. Onder mnr. Frank le Roux is ’n "rugbievoetbalklub", 'n tennisklub en 'n debat- en kultuurvereniging gestig. Op akademiese terrein het die personeel probeer om Afrikaanse vakterme te skep en om leerstof in dié taal daar te stel.
Die tweede jaar, 1921
wysigIn 1921 was die leerlingtal 149. Die personeel vermeerder tegelykertyd van vyf na agt. In Mei is 'n tak van die "Kristenstudentevereniging" gestig. 'n Kadetkorps is ook begin, die eerste basaar en musiekuitvoering word aangebied en die eerste toneelstuk, Afrikanerharte, word op die planke gebring. Die eerste bibliotekie is ook ingerig. Daar is verder op die skool se kleure besluit, 'n skoolwapen is ontwerp en die leuse "Laat daar Lig wees" is aanvaar en die eerste jaarblad uitgegee. Die ruimte in die Jouberthuis het in 1921 krisisafmetings aangeneem. Elke kamer in die huis, sowel as die waenhuis, is beset.
1922 tot 1929
wysigIn 1924 het die leerlingtal op 351 gestaan, waarna dit in 1927 die 300-kerf verbygesteek het en in 1929 sou dit 400 haal. In 1924 is die eerste koshuis in 'n huurhuis naby die Joubert-woning gevestig. Die skool het hierdie jaar sy eerste matrieks opgelewer.
In 1925 is die skool opgegradeer van 'n B- na 'n A-skool en die hoeksteen van die nuwe gebou is deur genl. J.B.M. Hertzog gelê op 'n perseel in Bondstraat, Clydesdale.
Op 26 Januarie 1927 het die skool die nuwe terrein betrek. Met die skool wat uit die staanspoor oorvol was, het die onderwysdepartement nie kans gesien om aanbouings te onderneem nie.
In Januarie 1928 het die skool in sy nuwe tuiste in Lynnwoodweg met sowat 360 leerlinge en 19 onderwysers geopen. Die meisiekoshuisgangers het 'n nuwe koshuis in 1929 betrek. In daardie jaar word nog 'n ideaal verwesenlik toe die TOD die seunskoshuis begin bou het.
Teen 1929 het die Lynnwoodweg-gebou van die Afrikaanse Hoërskool ook nie meer genoeg ruimte gebied nie en daar is besluit om die seuns en meisies vanaf 1930 te skei. Die eerste afsonderlike skole vir seuns en meisies, wat Afrikaans as medium sou gebruik, kom tot stand.
Die seunskool sou in die Lynnwoodweg-gebou bly en die meisieskool sou na die eerste setel van die Afrikaanse Hoërskool in Bondstraat skuif.
Mnr. F.J. le Roux, wat die eerste hoof van die Afrikaanse Hoërskool was, het die Afrikaanse Hoër Seunskool tot sy aftrede in 1946 gelei en mej. E.M. Verster beklee die hoofpos van die Afrikaanse Hoër Meisieskool tot in 1944.
Onlangse geskiedenis
wysigOor 100 jaar het die Afrikaanse Hoërskool se getalle gegroei van net meer as 40 tot sowat 2 500 meisies en seuns.
Pretoria se eerste Afrikaans-medium hoërskool, bekend as die Afrikaanse Hoërskool, het sy deure op 28 Januarie 1920 in die woonhuis van genl. Piet Joubert in Visagiestraat 218 geopen. Die groeiende vraag na onderrig in Afrikaans het daartoe gelei dat die Afrikaanse Hoërskool in 1930 weens ’n ruimteprobleem in die Afrikaanse Hoër Seunskool (AHS) en die Afrikaanse Hoër Meisieskool Pretoria (AHMP) verdeel is.
En so begin die storie van die Nasionale staat van inperking… 23 Maart 2020 word daar aangekondig dat die land vanaf 26 Maart vir 21 dae in 'n staat van inperking sal wees weens die Covid 19 pandemie.
Alle skole in Suid-Afrika is op 18 Maart 2020 gesluit. Teen middel-Junie het skole vir graad 7- en 12-leerders heropen,
Op 23 Julie 2020 het president Ramaphosa aangekondig dat staatskole vir 'n maand gesluit moet word weens die toename in covid-19 infeksies. Dit sal duur van 27 Julie tot 24 Augustus. Graad 12-leerlinge en -onderwysers neem egter slegs 'n weeklange onderbreking en het op 1 Augustus teruggekeer. Graad 7's neem 'n ruskans van twee weke en keer op 10 Augustus terug. Ramaphosa het ook aangekondig dat die huidige akademiese jaar verleng sal word tot 15 Desember.
By skole het die akademiese jaar in 2021 traag aan die gang gekom, weens vrese van onderwyders en ouers oor die welstand van hul kinders. By skole en universiteite is alle voorsorgmaatreëls streng toegepas, soos temperatuurmonitering, die verpligte dra van maskers en sosiale distansiëring tussen leerders/studente. Skole is deur die Minister van Basiese Onderwys aangesê om op 30 Junie te sluit. (Wikipedia)
Die minister van gesondheid het op 22 Junie 2022 die laaste COVID-19-veiligheidsmaatreëls herroep, insluitend die verpligte dra van maskers.
Op Vrydag 22 Julie 2022 is dit die eerste keer in 2 jaar 3 maande en 22 dae dat die hele skool Vrydagsaal kan bywoon. Hoendervleis mooi oomblikke!
Koshuis
wysigHuis Steijn se deure is in Julie 1940 geopen. Die koshuis het ‘n eiesoortige karakter ontwikkel wat waarheid verleen aan die koshuis se leuse “Waar haar hart lê”. Die kameraderie tussen die koshuisleerders word gekenmerk deur lojaliteit, trots, saam lag en saam huil.
Die name van die verskillende huise simboliseer Huis Steijn se waardestelsel:
Respicio (Respek): Respek is een van die eerste waardes wat ‘n nuwe dogter in Affies moet leer. Daarom is dit die benaming vir die Gr.8-koshuis. Dit vergestalt respek vir die koshuis en skool se waardes, ons respek vir mekaar en teenoor almal met wie ons in aanraking kom.
Fidelitas (Lojaliteit): 270 sussies, vier huise, een eenheid. Ons is EEN. Saam sal ons staan, deur dik en dun.
Probitas (Eerlikheid): Eerlikheid is geëts in die koshuis se 82 jarige bestaan en die tradisies en geskiedenis wat oor die jare gevestig is.
Superbia (Trots): Ons is trots op wie en wat ons is en op dit wat ons vermag wanneer ons saamstaan. Ons is trots daarop dat elke dogter in Huis Steijn ‘n rol speel om hul eie talent tot die sukses van die koshuis te kan byvoeg.
Vincent's restaurant
wysigDaar is 'n Restaurant op die skoolterrein, genaamd Vincent's, na aanleiding van die skool se geliefde sekuriteitswag wat sedert 2007 die hoofhek getrou beman. Die naam is deur die leerlinge gekies uit voorstelle van die leerlinge. Vincent ken elke Affie (leerling) op haar naam, of groet net met 'n "more sussie". Hy ken selfs die ouers en hul motors, en kan leerlinge beduie waar hul ouers geparkeer het na skool. Hy ontvang goed soos hokkiesakke en kunsprakties om aan vergeetagtige Affies te gee en waak teen gevare, soos selfoon diewe.
Die restaurant word met 'n seremonie ingewy. Die reaksie op die vernoeming van die skool se restaurant na die hekwag gryp menigte harte aan.
Die eeufeesvieringe
wysigDinsdag die 28 Januarie 2020 is dit presies ’n eeu sedert die ontstaan van die aanvanklike Afrikaanse Hoërskool en die meisies en seuns het saam groot makietie gehou.
Ongeveer 3 000 leerlinge, onderwysers en alumni het aan ’n staptog deelgeneem van Burgerspark in die middestad tot by AHS waar daar verder feesgevier is. Die staptog simboliseer dat die skole hul voorsate eer. "Met die stap vereenselwig ons onsself met die verlede, maar ons neem deel aan die toekoms. Dit is om die jeug bewus te maak waar ons vandaan kom en dan eindig ons by ons huidige skole wat dui op die toekoms waarheen ons op pad is," sê Perry Joynt, AHS-skoolhoof. “Een maal ’n Affie, altyd ’n Affie” en “Ek wil ’n Affie wees” lui van die plakkate wat omhoog gehou word, terwyl die leerlinge in die straat afstap en luidrugtig sing.
“Wat ons Affies doen is dat ons goed op ons eie unieke manier doen, maar dit is onmoontlik om Affie-wees vir mense te beskryf. Dit is iets wat in die hart lê – die kern van tradisies, waardes en ’n karakter,” sê Marna Jordaan, skoolhoof van die Afrikaanse Hoër Meisieskool Pretoria. “Nie een van ons twee skole is geneig om net met gewoon tevrede te wees nie – ons streef uitnemendheid na.”
Joynt se wens vir albei skole is dat huidige en toekomstige Affies iets beleef van die hart van hierdie skole, die tradisie en dat die kern van dié tradisieryke skole altyd bewaar word. “Saam met dit wens ek dat ons dinamiese uitgang en groei stimuleer en dat ons relevant sal bly vir die toekoms,” sê hy.
Hoofde deur die jare
wysigDie eerste hoof van die Afrikaanse Hoër Meisieskool is 'n 100 jaar oud in die 100 jaar het die skool 5 hoofde gehad:
- Mej. Evelyn Verster (1930-1944)
- Mej. Elizabeth Steyn (1945-1962)
- Mej. Agnes Holtzhausen (1964-1985)
- Mej. Louisa Venter (1986-2007)
- Mej. Marna Jordaan (2008-tans hoof)
Noemenswaardige alumni
wysig- Helena Barnard – 1987-wenner van die Suid-Afrikaanse Akademie vir Wetenskap en Kuns se Geskiedenis-olimpiade.
- Ilse Andrag – skrywer, sanger en filmvertaler.
Akademici
wysig- Susan Marx (1995) BA University of Southern California (Summa Cum Laude 2004), MA University of California (2007), LLM International Human Right Law (University of Oxford 2010)
- Prof. Gerda Saunders (nee Steenekamp) (1965) 'n Professor in Gender Studies by die Universiteit van Utah.
- Fransi Phillips (1995) Honneurs in Filosofie en Kunsgeskiedenis (Skrywer, Filosoof) Kunskritikus vir die Tjeggiese Ambassade en hou tans skool in Rusland.
- Sheila Cussons (1938) Studeer in Amsterdam verder in die Etskuns. In 1992 word sy deur die Universiteit van Natal vereer met 'n Eredoktorsgraad vir haar bydrae tot Afrikaans. Sy het 25 jaar in die buiteland gewoon.
- Anel van Aswegen (1991) Aangestel as erelid van die Research Board of Advisors of the American Biographical Institute – 2002, 2004 – permanenete aanstelling as Professor.
- Trudi Koelerman (1961) behaal in 1965 haar diploma in sang, klavier en orrel aan die Pretoriase Musiek Konserwatorium cum laude. Ontvang 'n beurs om by die Rotterdamse Konserwatorium in Nederland te gaan studeer.
- Anthea Joubert (1974) SA Ambassade Moskou.
- Aleta Michaletos (1969) stal haar kunswerke uit by die Galery La Villette in Parys, Frankryk.
Aktrises & TV-aanbieders
wysig- Katinka Heyns (Word in 2019 as Silwerskerm Legende aangewys)
- Lizz Meiring
- Brumilda van Rensburg
- Sandra Prinsloo
- Vanes-Marie du Toit-Proudfoot – netbal
Sportlui
wysig- Atletiek
Zenéy van der Walt (gebore 22 Mei 2000) is 'n atleet wat spesialiseer in 400 meter-hekkies. In 2017 wen sy die o/18 Wêreldkampioenskap, in 2018 die o/20 Wêreldkampioenskap en in 2019 'n silwermedalje by die Universiade.
- Netbal
- Eldené Bishoff, AHMP 2002-2006, o/21 Protea Netbalspan 2007 - 2009
- Vanes-Mari du Toit-Proudfoot, AHMP 2003-2007, o/21 Protea Netbalspan 2009-2011, Protea Netbalspan 2011-2019
- Izette Griesel, AHMP 2006 - 2010, Protea Netbalspan vanaf 2015
- Marlize de Bruin, AHMP 2008 - 2012, Fast 5 Protea Netbalspan 2016
- Chante Louw, AHMP 2012 - 2016, President 12 Netbalspan 2018
- Danielle van Zyl, AHMP 2013 - 2017, o/21 Protea Netbalspan 2019-2020
Verwysings
wysig- ↑ "Afrikaanse Hoër Meisieskool Pretoria: Geskiedenis". Besoek op 5 Mei 2015.
Eksterne skakels
wysig
Wikimedia Commons het meer media in die kategorie Afrikaanse Hoër Meisieskool.- Die skool se amptelike webwerf in Afrikaans
