Amienwas

Amienwas, wat ook na verwys kan word as suurgasverwydering en suurgasversoeting, verwys na 'n groep prosesse wat waterige oplossings van verskeie amiene gebruik om waterstofsulfied (H₂S) en koolstofdioksied (CO₂) vanuit gasse te verwyder. Dit is 'n algemene eenheidswerking in olieraffinaderye, petrochemiese aanlegte en aardgas verwerkingsaanlegte asook ander nywerhede.

Prosesse in olieraffinaderye of aardgas-verwerkingsaanlegte wat waterstofsulfied en/of merkaptane verwyder word algemeen na verwys as versoetingsprosesse, omdat hulle 'n produk lewer wat nie meer die suur, onwelriekende reuke van merkaptane en waterstofsulfied bevat nie.

Daar bestaan baie verskillende amiene wat gebruik word in gasbehandeling:

• Monoëtanolamien (MEA)
• Diëtanolamien (DEA)
• Metieldiëtanolamien (MDEA)
• Diïsopropielamien (DIPA)
• Aminoëtoksieëtanol (diglikolamien) (DGA)

Die mees gebruikte amiene in nywerheidsaanlegte is die alkanolamiene MEA, DEA en MDEA.

Amiene word ook in baie olieraffinaderye gebruik om suurgasse vanuit vloeibare koolwaterstowwe soos vloeibare petroleumgas (VPG) te verwyder.

Beskrywing van 'n tipiese amienwasaanleg

Prosesvloeidiagram van 'n tipiese amienwasproses wat in die nywerheid gebruik word

Gasse wat H₂S of beide H₂S en CO₂ bevat word gewoonlik suur gasse genoem in die koolwaterstofverwerkingsnywerhede.

'n Tipiese amienwasbehandelingsproses (soos geïllustreer deur die vloeidiagram hier langsaan sluit 'n absorbeerder eenheid in en 'n hergenerator eenheid asook bykomstige toerusting. In die absorbeerder absorbeer die afwaartsvloeiende amienoplossing die H₂S en CO₂ vanuit die opwaartsvloeiende suur gas om 'n versoete gasstroom as produk te lewer en 'n amienstroom wat ryk is aan die geabsorbeerde gasse. Die ryk amienoplossing word dan na 'n hergenerator gestuur ('n stroper met 'n opkoker) om 'n herwonne of arm amienoplossing te lewer wat weer in die absorbeerder gebruik kan word. Die hergenerator se gestroopte oorhoofse gas bestaan dan uit gekonsentreerde H₂S en CO₂. In olieraffinaderye bestaan die stroopgas meestal uit H₂S, wat hoofsaaklik afkomstig is vanuit die swawelverwyderingsproses (hidrogenering) uit ru-olie. Hierdie H₂S-ryke gasstroom word dan gewoonlik na 'n Claus-proses gestuur om dit na elementêre swawel om te skakel. Die grootste hoeveelheid van die jaarlikse wêreldwye 64 miljoen ton swaelproduksie in 2005 was inderwaarheid die byproduk van koolwaterstofverwerkingsaanlegte. In sommige aanlegte sal verskeie amienabsorbeerder-eenhede 'n gemeenskaplike hergenerator deel.

Eksterne skakels

• Selecting Amines for Sweetening Units Geargiveer 10 November 2006 op Wayback Machine, Polasek, J. (Bryan Research & Engineering) en Bullin, J.A. (Texas A&M-universiteit), Gas Processors Association Regional Meeting, Sept. 1994.
• Natural Gas Supply Association Geargiveer 1 Januarie 2011 op Wayback Machine Sien onderaan by afdeling getiteld Sulfur and Carbon Dioxide Removal
• Sweetening LPG's with Amines Geargiveer 10 November 2006 op Wayback Machine, Holmes, J.W. (Bryan Research & Engineering), Spears, M.L. (Bryan Research & Engineering), en Bullin, J.A. (Texas A&M-universiteit), Chemical Engineering Progress, Mei 1984
• Description of the classic book on gas treating Geargiveer 16 Maart 2008 op Wayback Machine by Arthur Kohl & Richard Nielsen. Gas Purification (5th uitg.). Gulf Publishing. ISBN 0-88415-2200.