Anne Terblanche
Martie van den Heever (*21 April 1904, Dewetsdorp –† Desember 1960, Johannesburg) het boeke onder die skuilnaam Annette Terblanche geskryf. Sy was die vrou van die skrywer C.M. van den Heever.
Lewe en werk wysig
Herkoms en vroeë lewe wysig
Martha Maria Klopper is op 21 April 1904 op Dewetsdorp in die Vrystaat gebore[1] Sy begin met haar skoolopleiding op haar geboortedorp en matrikuleer dan aan die Oranje Meisieskool in Bloemfontein. Daarna studeer sy verder aan die Grey-universiteitskollege en die Bloemfonteinse Normaalkollege. Ná kwalifikasie gee sy onderwys op verskeie Vrystaatse dorpe.
Huwelik met C.M. van den Heever en betrokkenheid by Afrikaans wysig
Op 5 Julie 192[2]trou sy met Christiaan Maurits van den Heever, die bekende digter en skrywer. Sy vergesel hom in 1928 na Nederland, waar hy sy studies aan die Universiteit van Utrecht voortgesit het. Na hulle terugkeer na Suid-Afrika in 1931 woon hulle in Bloemfontein, waar haar man ’n pos as lektor aan die universiteit beklee. Wanneer hy aangestel word as professor aan die Universiteit van die Witwatersrand trek hulle in 1932 na Johannesburg. Hier stig sy in 1933 die Afrikaanse Dameskring, waarvan sy ook as voorsitter optree. In 1940 stig sy die Maria van Riebeeck-klub, die eerste vroueklub in Johannesburg. Daar is in hierdie tyd weens die depressie baie hulpbehoewende Afrikanergesinne in Johannesburg en hierdie klub stig dan die Help die Kind-fonds, wat later ’n volwaardige liefdadigheidsvereniging word[3] Sy stig in 1939 die vroueblad Die moderne vrou, wat later by Die Brandwag ingelyf word, waarvan sy die eerste redaktrise was.
Sterfte wysig
Sy is in Desember 1960 in Johannesburg oorlede.
Skryfwerk wysig
Onder haar eie naam en die skuilnaam Lydia skryf sy artikels en kortverhale in tydskrifte. Dit is egter onder die skuilnaam Annette Terblanche dat sy bekendheid verwerf en onder andere die jeugverhaal Die kinders van Bergkom laat publiseer. Baie bekend is ook haar boek oor etiket, Beskaafde maniere en die biografie oor Emily Hobhouse, beide ook as Annette Terblanche.
Publikasies wysig
| Jaar | Publikasies |
|---|---|
| 1945 | Beskaafde maniere |
| 1946 | Die kinders van Bergkom |
| 1948 | Emily Hobhouse |
Verwysings wysig
- ↑ Nienaber, P.J. Hier is ons skrywers! Afrikaanse Pers-Boekhandel. Johannesburg. Eerste uitgawe, 1949. bl. 115-116.
- ↑ Huweliksregister: https://familysearch.org/ark:/61903/3:2:77TD-8MJ2?i=529&wc=39ZX-16D%3A183083201%2C183132901%2C183132902%3Fcc%3D1910846&cc=1910846
- ↑ Geni-webwerf: https://www.geni.com/people/Christiaan-van-den-Heever/6000000022891837923