Arbeidersparty (Suid-Afrika, 1969)
Die Arbeidersparty was 'n politieke party vir Kleurlinge wat van 1969 tot 1994 in Suid-Afrika bestaan het en jare lank deur Allan Hendrickse gelei is. Hoewel hulle uitgesproke teen apartheid gekant was, het hulle aan die Verteenwoordigende Kleurlingraad deelgeneem.[1] Hulle was egter teen Umkhonto we Sizwe se guerrillastryd en die oproep om internasionale sanksies teen Suid-Afrika gekant.[2]
Die party het later die Raad van Verteenwoordigers in die Driekamerparlement (sedert die stigting daarvan in 1984 tot in 1992) oorheers. Hulle wen 76 van die 80 setels tydens die Suid-Afrikaanse algemene verkiesing van 1984 en 69 setels tydens die Suid-Afrikaanse algemene verkiesing van 1989.
Toe die Nasionale Party onder leiding van F. W. de Klerk besluit om nie-Wit lede te aanvaar, het talle Arbeiders oorgeloop en by die Nasionaliste aangesluit. In 1992 het 'n groep van 36 oudlede, gelei deur Jac Rabie, 'n mosie van wantroue teen Hendrickse uitgebring.[2] Met dalende peilings kom Hendrickse tot die gevolgtrekking dat die Arbeidersparty se doel uitgedien is, en ontbind hy die party in 1994. Hendrickse en sy volgelinge het daarna by die ANC aangesluit.[3]
Verkiesingsresultate
wysig| Jaar | % | Setels |
|---|---|---|
| 1969 | 26 (van 40 setels) | |
| 1975 | 31 (van 40 setels) | |
| 1984 | 76 (van 80 setels) | |
| 1989 | 65% | 69 (van 80 setels) |
Partyleiers
wysig- M.D. Arendse
- Sonny Leon
- Eerwaarde Allan Hendrickse
Verwysings
wysig- ↑ Allan Hendrickse's obituary in The Guardian.
- ↑ 2,0 2,1 South Africans of Mixed Race in a Political Shift. Christopher Wren, New York Times, 9 Februarie 1992.
- ↑ Recipients of the Order of the Baobab in Silver.[dooie skakel] The Presidency of South Africa.