Atherton Plato

Die Atherton Plato (Engels: Atherton Tablelands) is 'n vrugbare plato wat deel vorm van die Groot Skeidingsgebergte in Queensland, Australië. Dit is wes tot suid-suidwes binnelands vanaf Cairns geleë, diep in die trope maar sy hoë ligging gee daaraan 'n klimaat wat dit geskik maak vir melkboerdery. Die gebied beslaan 'n oppervlakte van ongeveer 32 000 km² met 'n gemiddelde hoogte van tussen 600 tot 900 m bo seevlak.

Die hoofrivier wat oor die plato vloei is die Barronrivier wat deur die Tinaroomeer opgedam word om besproeingsboerdery te bevorder.

Nywerheid

Atherton is vir die eerste keer deur James Mulligan in 1875 verken, maar John Atherton was die eerste pionier om homself in 1877 daar te vestig naby die dorp wat nou sy naam dra.

John Atherton was dan ook die persoon wat tin daar ontdek het. 'n Toeloop van myners het op hierdie ontdekking gevolg. Die bou van 'n pad deur die plato het 'n tweede toeloop tot gevolg gehad, naamlik die houtkappers wat op soek was na die gesogte rooi seder van die reënwoud. Alhoewel tin die aanvanklike rede was waarom Atherton gevestig is, bestaan die dorp deesdae hoofsaaklik as gevolg van die bosboubedrywighede in die gebied.

Voor Atherton self ontwikkel is, het 'n groot Chinese dorp daar ontstaan. Die Chinese was oorspronklik werkers op die Palmerrivier se goudvelde. Die Chinese setlaars daar het 'n groot rol gespeel in die ontwikkeling van die landbou in die noorde van Queensland aangesien soveel as 80% van alle gewasse deur hulle op die plato verbou is en het hulle daarom ook 'n belangrike rol gespeel om verdere nedersettings in die gebied moontlik te maak. Hulle was ook die eerstes om melkboerderye daar te vestig. Soos die bevolking van die Chinese dorp toegeneem het, is klein winkeltjies opgerig, en putte gegrawe vir watervoorsiening. Daar was ook kruiedokters, dokters en handelaars. Die rowwe strooihutte is vervang met houthuise met stoepe en sinkdakke. Teen 1909 het die Chinese dorp tot 'n bevolking van 1100 gegroei. Vandag herinner die Hou Wang Tempel aan die voormalige Chinese bevolking op die Atherton Plato.

Tydens die Tweede Wêreldoorlog was Australiese troepe in die gebied gestasioneer voordat hulle na die front vertrek het en ook met hulle terugkeer. Baie soldate is ook in die militêre begraafplaas in Atherton begrawe.

Gewasse wat in en rondom Atherton verbou word is suikerriet, mielies, avokados, aarbeie, macadamianeute, veselperskes en sitrusvrugte. Tabak was voorheen ook hier verbou. Bees- en pluimveeboerderye word ook op die plato aangetref. Toerisme dra ook by tot die ekonomie van die plato, met die Tinarroodam as die middelpunt. Yungaburra is ook vinnig besig om 'n gewilde bestemming te word met verskeie restaurante en oorslaapgeriewe.

Plekke van belang

Barrinemeer
Eachammeer
Gordynvyeboom - sowat 1km voor die dorp Yungaburra geleë.
Undara Vulkaniese Nasionale Park
Hann Plato Nasionale Park
Mount Hypipamee-krater en Dinner-valle - sowat 23 km suidwes van Atherton op die Kennedy-hoofweg geleë.