Bosnagaap

Die bosnagaap (Otolemur crassicaudatus) is een van drie spesies en die grootse van die nagape. Die soogdier kom in die oostelike dele van Suid-Afrika, Zimbabwe en die hele Mosambiek voor.

Bosnagaap
Bewaringstatus
Veilig  (IUCN 3.1)
Wetenskaplike klassifikasie
Koninkryk:	Animalia
Filum:	Chordata
Klas:	Mammalia
Orde:	Primates
Suborde:	Strepsirrhini
Infraorde:	Lorisiformes
Familie:	Galagidae
Genus:	Otolemur
Spesie:	O. crassicaudatus
Binomiale naam
Otolemur crassicaudatus É Geoffroy, 1812
Verspreiding van die bosnagaap

Kenmerke

Die bosnagaap het kenmerkende groot oë met groot kaal, beweeglike ore. Sy pels is dikker en meer wollerig as dié van die nagapie. Die mannetjies is effens groter as die wyfies. Sy agterbene is geweldig lank en gespierd om ver tussen bome te kan spring terwyl die voorbene daarinteen amper onderontwikkeld lyk. Die mannetjie weeg tot 1.2 kg terwyl die wyfie tot 1.13 kg weeg.

Habitat en gewoontes

Die bosnagaap verkies woude, berg- en kusbos en ruie boomveld in hoë-reënvalstreke. In droër dele verkies hulle rivierbos. Die bosnagape is ook groeplewende nagdiere en kom lank na sononder te voorskyn. Bedags sit familiegroepe hoog in bome en slaap, maar snags wei elkeen op sy eie. Hulle was hulle pote gereeld met urine om hulle greep aan boomtakke te verbeter. Hulle lewensduur is onbekend.

Hulle eet gom, vrugte, insekte en soms ook reptiele en voëls terwyl hulle natuurlike vyande die luiperd en reuse-ooruil is. Twee kleintjies word in Augustus tot September gebore na 'n dragtyd van 4 maande.

Galery

• 
  Twee by drinkbak
• 
  In uMkhuzewildtuin
• 
  In Letaba, Krugerwildtuin

Sien ook

• Lys van Suider-Afrikaanse soogdiere
• Lys van Suider-Afrikaanse soogdiere volgens wetenskaplike name
• Suider-Afrikaanse soogdiere en hul ordes

Verwysings

• Die Soogdiergids van Suider-Afrika. Burger Cillié. 2009. ISBN 978-1-875093-46-5