Burry Stander

Burry Willie Stander, (16 September 1987 – 3 Januarie 2013) gebore te Port Shepstone, KwaZulu-Natal, was een van  Suid-Afrika se bekendste bergfietsryers. Burry wen sy eerste Suid-Afrikaanse titel (XCO) formaat in die onder-13 kategorie gedurende 1999.

Burry Stander tydens die 2012 Olimpiese Somerspele.

Burry Stander wen die onder-23 Wêreldtitel.

Internasionale loopbaan

Gedurende 2005 kompeteer Burry in die VSA en wen drie uit die vier bergfiets-wedrenne waaraan hy deelneem. Sy talent word onmiddellik raakgesien en hy word genooi om vanaf 2006 vir die GT International Span te ry. Hy verower ook sy eerste Suid-Afrikaanse titel (XCO) formaat as 'n professionele ryer gedurende 2006. Gedurende 2007 voeg hy die Afrika-titel by sy trofeekas.

Gedurende 2008 verteenwoordig Burry Suid-Afrika tydens die Olimpiese Spele en behaal 'n verdienstelike 15de plek. Hy verower weereens die SA (XCO) formaat titel en wen verskeie plaaslike Marathon wedrenne. Hy behaal ook 'n 3de plek gedurende die SA Padfiets Kampioenskappe. Hy haal ook gereeld die podium tydens die World Cup-reeks en word gekroon as die onder-23 World Cup-reeks wenner.

Burry sluit aan by die gespesialiseerde Bergfiets-span gedurende 2009. Hy wen ook die onder-23 Wêreldkampioenskap (XCO) formaat titel en ook die Suid-Afrikaanse Maraton-titel. Hy herhaal die prestasie gedurende 2011, en hy en sy Specialized spanmaat, Christoph Sauser, wen die Cape Epic na hul vierde probeerslag gedurende 2011 en maak weer so gedurende 2012.

Burry is gekies om Suid-Afrika tydens die 2012 Olimpiese Spele te verteenwoordig waar hy 'n vyfde plek behaal het.

Persoonlike lewe

Gedurende Mei 2012 tree hy met Cherise Taylor, 'n bekende fietsryer in eie reg, in die huwelik.

Op 3 Januarie 2013 word hy naby Shelly Beach deur 'n minibus doodgery terwyl hy geoefen het. Hy was 25 jaar oud. Die bestuurder is op 17 April 2015 aan strafbare manslag skuldig bevind.