Calitzdorp Spa

Calitzdorp Spa (voorheen ook bekend as Olifantsbron, Olifantsrivierbad en Gamkabad) is 'n warmwaterbron in die Klein Karoo van Suid-Afrika.

Die bron lê aan die oewer van die Olifantsrivier, ongeveer 20 km van Calitzdorp, 40 km van Oudtshoorn, by 33°39′41″S 21°46′31″O. Dit is slegs enkele kilometers voor die Olifantsrivier en die Gamkarivier bymekaar aansluit om die Gouritsrivier te vorm.

Die oog lewer daagliks sowat 650 000 liter water teen 51°C op. Die water is sterk ysterhoudend en daarom donker van kleur. Die bron is al verskeie male deur die vloedwater van die rivier oorstroom.

Die bron is ver van die ou hoofroetes na die binneland geleë. Uit ou reisverslae is bekend dat Robert Jacob Gordon in 1771 en John Barrow in 1801 hier was. Tans is die Eden-distriksmunisipaliteit die eienaar van die bron.

Bibliografie

• www.calitzdorpspa.co.za
• Waring, Gerald A. en hersien deur Reginald R. Blankenship en Ray Bentall: Thermal springs of the United States and other countries – a summary. Washington: US Government Printing Office, 1965. (Geological Survey Professional Paper 492). Internet-aanlyn beskikbaar.