Die Tuinroete-distriksmunisipaliteit (voorheen Eden-distriksmunisipaliteit) is een van die 5 distriksmunisipaliteite van die Wes-Kaap. Die setel van die munisipaliteit is in George. Die meeste inwoners in die munisipale gebied is Afrikaanssprekend. Die munisipaliteit se kode is DC4.
Die distriksmunisipaliteit is in 2000 gestig deur die Klein Karoo- en Suid-Kaap-distriksrade saam te smelt. Alhoewel Tuinroete se raad nog nie 'n wapen aangeneem het nie, het albei sy voorgangers wapens gevoer.
Klein Karoo — Die wapen is in 1991 by die Buro vir Heraldiek geregistreer: In silwer, in die skildhoof swart hoekige tweelingbalke, daaroorheen 'n horing van oorvloed wat vrugte uitstort, alles van natuurlike kleur; die skild oortop met 'n muurkroon met drie uitkomende torings, alles silwer. Die skildhouers was twee volstruise, en die wapenspreuk "Servire populo".[1]
Suid-Kaap — Hierdie raad het aanvanklik die wapen van een van sy voorgangers, die George-afdelingsraad, gebruik.[2] Dit het in 1997 'n nuwe wapen by die Buro vir Heraldiek geregistreer :Golwend deursnede van groen, en in die skildvoet golwend gedwarsbalk van vier stukke, silwer en blou, op die groen belaai met 'n silwer vyfpuntige ster tussen twee goue bye; 'n hoekige silwer skildhoof; die skild oortop met 'n muurkroon met drie uitkomende torings, alles goud. Die skildhouers was twee Knysaloeries, en die wapenspreuk "Spectemur agendo".[1]
.svg)
.svg)