Chochloma

Chochloma (Russies: хохлома́) is ’n Russiese houtskilderstyl met helder blom- en ander plantpatrone in hoofsaaklik rooi en goud op ’n swart agtergrond. As dit vir houteetgerei of meubels gebruik word, gee dit die voorwerpe ’n swaarder, metaalagtige voorkoms.

Chochloma-skilderwerk van naby gesien.

Dit is ook bekend as chochloma-skilderwerk (хохломская роспись, chochlomskaja rospis).

Geskiedenis

’n Houtlepel met die chochloma-motief.

Dit is in die tweede helfte van die 17de eeu die eerste keer gemaak in wat vandag bekend is as die Kowerninski-distrik van die Nizjni Nowgorod-oblast. Dit is genoem na Chochloma, ’n handelsnedersetting in dieselfde oblast wat tussen die 18de en vroeë 20ste eeu bekend was vir die inwoners se kunsvlytartikels. Die maak van chochloma is in 1659 die eerste genoem in ’n brief van ’n bojaar met die naam Morozof aan sy rentmeester, met ’n bestelling vir 100 geverfde borde en 60 wynbekers.

Die kunsvorm het sy oorsprong onder die Ougelowiges, wat van hul vervolgers gevlug en in die plaaslike woude geskuil het. Onder hulle was ikoonskilders wat dié skildertegniek aan die plaaslike inwoners geleer het.

’n Oorspronklike tegniek om hout ’n goue kleur te verf sonder dat regte goud gebruik word, is tipies van chochloma. Artikels wat uit hout gekerf is (meestal eetgerei), het gewoonlik ’n grondlaag van klei, vlasolie en tinpoeier gekry (deesdae word aluminium gebruik). ’n Blompatroon is dan met ’n kwas op die grondlaag geskilder. Daarna het die artikel ’n laag vlasolie gekry (deesdae word sintetiese olie gebruik) en is dit by ’n hoë temperatuur verhard. ’n Kombinasie van rooi, swart en goue kleure word meestal gebruik.

Dit het gelyk of chochloma se gewildheid in die vroeë 20ste eeu afgeneem het, maar dit het in die Sowjettyd ’n herlewing ondervind toe twee fabrieke by Chochloma en Semjonof die middelpunt geword het vir die maak van tafelgerei, eetgerei (veral lepels), meubels, aandenkings, ens. In 1972 het die Chocloma-museum sy deure in Semjonof geopen.

Galery

• 
  Chochloma-vervaardigingsproses.
• 
  Chochloma-ware.
• 
  ’n Groot chochloma-lepel.
• 
  Chochloma-kombuisware op ’n Sowjet-posseël.

Eksterne skakels

• Khokhloma ware: folk art for the masses (en)
• Khokhloma Painting (en)
• Wikimedia Commons het meer media in die kategorie Chochloma.
• Hierdie artikel is vertaal uit die Engelse Wikipedia