Coornhoop

Coornhoop (ook Koornhoop, Corenhoop, Coorenhoop) is 'n historiese 17de eeuse plaashuis. Dit is geleë by Dixtonweg 2 in Observatory (Kaapstad). Tans huisves dit die Centre for Conflict Resolution.

Coornhoop

Geskiedenis

In 1657 en 1658 het Jan van Riebeeck op die westelike oewer van die Liesbeek aan 14 Vryburgers grond gegee om met koring te boer. Om hulle oes teen strooptogte deur die Khoikhoi te beskerm is 'n ry fortjies en skure al langs die rivier gebou. In September 1657 is die skure by Coornhoop voltooi. Sou 'n aanval dreig, moes die vroue en kinders van die nabygeleë landerye daarin kom skuil. Na 4 jaar het die geboue by Coornhoop in onbruik verval. 'n Hele reeks eienaars het die grond daarna onderverdeel en soms weer stukke gekonsolideer en die skure verbou tot woonhuis. Dit is tot een van die Kaapse Skiereiland se mooiste opstalle ontwikkel. In die 19de en 20ste eeu het die geboue verval en is een na die ander gesloop.

Argitektuur

In 1961 het die Stigting Simon van der Stel die bouvalle gekoop en in 1964 ingrypend gerestoureer. Die endgewels van die oorblywende skure is van die holboltipe en dateer uit 1797.

Duiwehok

Agter twee rye van elk drie boë staan 'n unieke dubbelverdieping duiwehok. Dit verbind twee van die oorspronklike skure. Die vooraansig is 'n kenmerk van die Kaapse argitektuur. In 1966 is slegs hierdie duiwehok tot gedenkwaardigheid verklaar. In die William Fehr-versameling is daar 'n skets uit 1896 deur A.F. Truter van die duiwehok.

W.P. Landbou-unie

Op 24 Mei 1971 het die landbou-unie 'n inligtingsbord voor die gebou aangebring wat die name vermeld van die eerste 14 vryburgers wat hier by Coornhoop, De Hollantse Thuijn en Groenevelt gevestig is.

Bibliografie

• Fransen, Hans: A guide to the old buildings of the Cape. A survey of extant architecture from before c1910 in the area of Cape Town, Calvinia, Colesberg, Uitenhage. Johannesburg: Jonathan Ball, 2004. ISBN 1-86842-191-0
• Oberholster, J.J.: Die historiese monumente van Suid-Afrika. Kaapstad: Kultuurstigting Rembrandt van Rijn vir die Raad vir Nasionale Gedenkwaardighede, 1972. ISBN 0-620-00191-7
• Standard Encyclopaedia of Southern Africa, dele 4 en 6.
• van Bart, Martiens: Hoop vir De Coornhoop? Kultuurkroniek, Die Burger, 29 November 2003.
• www.ccr.org.za