William Fehr-versameling

versameling van William Fehr (1892–1968)

Die William Fehr-versameling is 'n groot versameling Afrikana wat in die Kasteel die Goeie Hoop en in Rust en Vreugd in Kaapstad besigtig kan word. Dit is van besondere kultuur-historiese waarde vir Suid-Afrika.

Rust en Vreugd, waarin 'n deel van die versameling bewaar word.

Versamelingsdoel wysig

Fehr se versamingsdoel was eerstens die historiese belang van die item vir Suid-Afrika en tweedens die artistieke meriete. Met die gevolg dat daar baie skilderye is deur onbekende kunstenaars. Die 650 skilderye in Rust en Vreugd is van 155 kunstenaars. Die onderwerpe wat Fehr versamel het, is meestal uitbeeldings van die daaglikse lewe aan die Kaap, straattonele, Kaap die Goeie Hoop, St. Helena, die platteland, diamantmyne, Kaapstad, die oostelike deel van die Kaapkolonie, Transkei, Natal, Vrystaat en die binneland tot die Zambezirivier.

Kasteel wysig

Tydens die Van Riebeeckfees in 1952 is 'n deel van William Fehr se versameling in die Kasteel uitgestal. In 1964 is hierdie versameling deur die staat gekoop omdat besef is dat dit van nasionale belang is.

Dit het uit olieverfskilderye bestaan en het seeskappe en uitbeeldings van Tafelbaai en Tafelberg as motiewe gehad. Die kunstenaars was o.a. Thomas Bowler, F.I. I'Ons, W.H.F.L. Langschmidt, en John Thomas Baines. Buiten artikels bekend in 17de tot 19de eeuse Kaapse huishoudings was daar Chinese en Japanse porselein, insluitende verskeie items met die VOC se monogram. Daar is elegante dog eenvoudige antieke Kaapse meubels van stink- en geelhout uit die 18de eeu. Items van Kaapse silwer, glas, brons en koper illustreer die leefwyse van die tyd. 'n Olieverfskildery van 127 cm by 96 cm deur I'Ons beeld 'n groep Britse Setlaars aan die Groot-Visrivier uit.

Rust en Vreugd wysig

In Rust en Vreugd word, op die versameling van die Johannesburgse Africana Museum na, die beste versameling Africana in die land bewaar.

Toe die huis Rust en Vreugd beskikbaar raak vir 'n kunsgalery, het Fehr besluit om sy waardevolle versameling afdrukke en tekeninge aan die Suid-Afrikaanse volk te skenk. Die huis met sy 6 groot kamers vol piktorale Afrikana is in 1965 as museum geopen.

Die oudste skildery is deur Wouter Schouten (1638–1704). Dit is 'n klein waterverskildery van Tafelberg. Schouten was nooit in Suid-Afrika nie en sy prent is gebaseer op verhale. Gevolglik het ons 'n romantiese voorstellling – Tafelberg te hoog, Leeukop te groot en die mense lyk meer na Rooihuide as na Khoi of San.

Verskeie skilderye is deur vroeë besoekers aan die Kaap. William Hodges was die amptenaar-skilder op die skip Resolution saam met kapt. James Cook op sy tweede reis om die wêreld. Ander skilderye toon die belangrikste sosiale, politieke en ekonomiese gebeure van die 19de eeu soos byvoorbeeld die besoek van die Amerikaanse skip die Alabama en die diamantmyne by Kimberley.

Thomas Bowler word verteenwoordig deur 28 skilderye, waarvan een uit 1864 hoe hy Kaappunt sien vanaf see. H.C. De Meillon het 22 tekeninge gelewer. Van die reisiger en skrywer William Cornwallis Harris is hier twee waterverfkilderye. Ethel Dixie (1876–1973) se skilderye van blomme en Edmund Caldwell (1851–1923) se skilderye van Afrika-diere is in die versameling opgeneem.

Landkaarte deur die vroeë kartograwe Willem Blaeu, Nicolaes Visscher en Henricus Hondius word uitgestal.

Fotogalery wysig

Enkele van die werke:

Bibliografie wysig

  • Fransen, Hans: Guide to the museums of Southern Africa. Kaapstad: South African Museums Association, 1978.
  • Green, Eldred: Rust en Vreugd and its pictures. Lantern, April 1979, Jaargang 28, nr. 2.
  • The Fehr Collection. Lantern, Maart 1958, Jaargang 7, nr. 3.