William Fehr

William Fehr (Burgersdorp, 17 April 1892 – Kaapstad, 2 April 1968) was 'n Suid-Afrikaanse sakeman en versamelaar van kuns en oudhede.

William Fehr
Gebore	17 April 1892 Burgersdorp, Kaapkolonie
Sterf	2 April 1968 (op 75) Kaapstad, Suid-Afrika
Nasionaliteit	Suid-Afrika
Beroep	sakeman en versamelaar van kuns en antiek

Ná voltooiing van sy skoolloopbaan aan die Albert-Akademie op Burgersdorp gaan Fehr vir verdere studie na Europa en keer aan die einde van die Eerste Wêreldoorlog na Suid-Afrika terug. Daarna sluit hy by die familieonderneming in Kaapstad aan en word mettertyd die hoof van die maatskappy wat handel dryf in suiker, tabak en sigarette.

Fehr stel baie belang in die geskiedenis van sy eie familie. Hoewel sy vader 'n immigrant uit Duitsland was, was sy moeder 'n dogter van die bekende Suid-Afrikaanse Maskew-familie wat op hul beurt verbonde was aan die families Theron, Berning en Lepan.

Hy het 'n passie gehad om items van historiese belang vir Suid-Afrika te versamel. Dus koop hy in die buiteland Afrikana aan en voer dit in. Sy versameling staan nou bekend as die William Fehr-versameling en word in die Kasteel en in Rust en Vreugd in Kaapstad gehuisves.

Fehr het verskeie artikels oor Afrikana geskryf. Die boeke The Old Town House (1955), Caldwell's animals (1961) en Treasures of the Castle of Good Hope (1963) het uit sy pen verskyn. In 1968 vertaal hy uit Duits die boek uit 1807 deur Ludwig Alberti met die Engelse titel Account of the Tribal Life and Customs of the Xhosa.

Fehr was lid van verskeie bewaringsliggame vir sowel kultuur- as natuursake. In 1963 vereer die Universiteit van Kaapstad hom met 'n eredoktorsgraad in die regte. Die Raad vir Nasionale Gedenkwaardighede het in 1968 'n goue medalje aan hom toegeken.

Die William Fehr versameling

• 
  Table Bay, 1683, Aernout Smit (1683)
• 
  The Noord-Nieuwland in Table Bay, 1762, Anonymous (fl. 18de eeu) (1762)
• 
  English ships in Table Bay, 1787, Robert Dodd (1787)
• 
  Table Bay, Samuel Scott (ca. 1730)
• 
  Canteen Scene during the Frontier Wars, W.H.F.L. Langschmidt (ca. 1850)

Bibliografie

• Fehr Collection. Lantern, Jaargang 7, nr.3, Maart 1958.
• Standard Encyclopaedia of Southern Africa, deel 4. Kaapstad: Nasou, 1971. ISBN 0-625-00320-9