Dan Cruickshank
Dan Cruickshank (* 26 Augustus 1949 in Londen, Engeland as Daniel Gordon Raffan Cruickshank[1]) is 'n Britse kunshistorikus, skrywer en BBC-televisieaanbieder wat veral in argitektuurgeskiedenis belangstel. Sy bekendste televisiereekse sluit Britain's Best Buildings en Around the World in 80 Treasures in. 'n Groot verskeidenheid werke oor boukuns en die geskiedenis van die Verenigde Koninkryk het uit sy pen gekom, waaronder Around the World in 80 Treasures, Life in the Georgian City, The Guide to the Georgian Buildings of Britain and Ireland, The Country House Revealed, Invasion: Defending Britain from Attack, The Story of Britain's Best Buildings en Spitalfields: The History of a Nation in a Handful of Streets. Die laasgenoemde boek is geïnspireer deur sy eie lewe - hy woon al vier dekades lank in 'n vroeg-18de eeuse Georgiaanse huis in Elder Street in die Londense buurt Spitalfields.
Cruickshank, wat 'n BA-graad in kuns, ontwerp en argitektuur verwerf het, is 'n eregenoot van die Royal Institute of British Architects (RIBA) en was drie jaar lank 'n besoekende professor in die Departement Argitektuur van die Universiteit van Sheffield. As een van die Verenigde Koninkryk se voorste kenners op die gebied van boukuns en historiese geboue dra Dan Cruickshank gereeld by tot die Britse argitektuurtydskrifte The Architects' Journal en The Architectural Review.