Dwerggalery

'n Dwerggalery is 'n argitektoniese dekorasie in die Romaanse argitektuur.

Relikwieë afkomstig van die dwerggalery van die Basiliek van Sint Servaas in Maastricht tydens die sewejaarlikse pelgrimstog (Blokboek van St Servaas, ±1460)

Dit is 'n natuurlike ontwikkeling en -voortsetting van die blinde arkade, en bestaan uit 'n galery met arkades, gewoonlik net onder die dak, wat ingelê is in die mure. Gewoonlik kom dwerggalerye by 'n kerktoring of apsis voor. Dit kom egter ook gereeld in ander dele van geboue voor, of selfs deur die hele gebou. Alhoewel dit hoofsaaklik as 'n dekoratiewe element bedoel is, kan toegang tot sommige dwerggalerye verkry word. Tydens die sewe-jaarlikse Pelgrimstog van die Relikwieë in Maastricht is relikwieë wat afkomstig is van die dwerggalery van die Basiliek van Sint Servaas daagliks aan Christelike pelgrims vertoon wat voor die kerk in Vrijthof vergader het.

Dwerggalerye verskyn hoofsaaklik by Romaanse kerke in Duitsland en Italië. 'n Paar voorbeelde kan gevind word in België en Nederland. Dit is opvallend dat daar in Frankryk geen dwerggalerye gebou is nie. Die oudste kerk in Duitsland met 'n dwerggalery is die Katedraal van Trier. Die apsis en dwerggalery in die Speyer Katedraal, wat beskryf is as "een van die mees onvergeetlike Romaanse ontwerpe", is op baie ander plekke in die Rynland nagemaak. Verskeie van Keulen se twaalf Romaanse kerke bevat dwerggalerye, asook belangrike Rynlandse kerke soos die Katedraal van Mainz, die Katedraal van Worms en Bonn Minster.

In Italië kom dwerggalerye voor by kerke in die sentrale en noordelike streke van die land. Voorbeelde hiervan is Santa Maria della Pieve in Arezzo, die Katedraal van Modena, die Katedraal van Pistoia, die San Donato in Genoa en die Katedraal van Pisa. Die beroemde Skewe Toring van Pisa beskik oor ses ringe dwerggalerye.

In Frankryk is eenvoudige dwerggalerye skaars. By sommige gewels is beeldhouwerke tussen die kolomme geplaas. Die bekendste is die Galerye van Konings (Galeries des Rois) by die Notre-Dame-katedraal en die Katedraal van Amiens.

Galery

• 
  Pisa Katedraal
• 
  Speyer Katedraal
• 
  Roermond, Minster
• 
  Laon Katedraal
• 
  Galery van Konings by die Notre-Dame-katedraal
• 
  Montreal, Windsor-stasie, Montreal

Sien ook

• Blinde arkade