Enid Blyton

Enid Blyton (1897–1968) was ’n Britse skrywer van kinderboeke. Sy is veral bekend vir haar reekse oor Knikkie (Noddy), die Famous Five en Secret Seven. Sedert die 1930's is meer as 600 miljoen eksemplare van haar boeke verkoop. Hoewel sy lank gelede oorlede is, is haar werk steeds gewild by kinders.

Enid Blyton
Boeke wat sy geskryf het.
Gebore	Enid Mary Blyton 11 Augustus 1897 East Dulwich, Suid-Londen
Sterf	28 November 1968 Hampstead, Londen
Bynaam	Mary Pollock
Beroep	Skrywer, digter, onderwyser
Nasionaliteit	Verenigde Koninkryk
Genre	Kinderboeke
Noemenswaardige werke	Noddy, Famous Five, Secret Seven

Blyton se werk bestaan onder andere uit boekreekse met terugkerende karakters vir verskillende ouderdomsgroepe. Haar boeke is verbeeldingryk, maar gewoonlik sonder towerkuns. Die boeke is in bykans 90 tale vertaal en is veral gewild in lande soos Engeland en Australië.

Beknopte biografie

Twee van Blyton se karakters, Knikkie (Noddy) en Groot-ore (Big Ears).

Plaket in Dulwich.

Blyton se huis in Bourne End (Buckinghamshire).

Enid Mary Blyton is op 11 Augustus 1897 in East Dulwich in Suid-Londen as die oudste van drie kinders gebore. Haar eerste boek, Child Whispers, 'n versameling van gedigte, is 1922 gepubliseer.

Ná die kommersiële sukses van haar vroeë romans, soos Adventures of the Wishing Chair (1937) en The Enchanted Wood (1939) het sy 'n literêre ryk van haar eie opgebou. Sy het soms tot vyftig boeke per jaar geskryf, bo en behalwe haar produktiewe bydraes tot tydskrifte en koerante. Haar skryfwerk was onbeplan en het grootliks uit haar onderbewussyn opgespring. Sy het haar stories getik soos gebeure voor haar ontvou het.

In die 1950's was haar werk toenemend omstrede onder literêre kritici, onderwysers en ouers, omdat dit volgens hulle nie literêre meriete gehad het nie. Sommige biblioteke en skole het selfs haar werk verbied. Van die 1930's tot die 1950's het die BBC ook geweier om van haar werk uit te saai. Haar boeke is gekritiseer as elitisties, seksisties, rassisties, xenofobies en in stryd met die meer liberale omgewing van die opkomende, post-oorlogse Brittanje. Haar boeke was egter tot haar dood in 1968 topverkopers gewees.

Blyton het gevoel dat sy 'n verantwoordelikheid teenoor haar lesers het. Sy wou hulle van 'n sterk morele raamwerk voorsien, en het hulle aangemoedig om verdienstelike sake te ondersteun. Sy het onder andere klubs gestig en ondersteun wat fondse vir liefdadigheid en dierebeskerming insamel het.

Haar oeuvre bestaan uit ongeveer 600 titels. Daar word vertel dat sy soms 10 000 woorde per dag geskryf het, wat daarop dui dat sy moontlik hulp van ander skrywers ontvang het. Sy het dit hewig ontken en dit is nooit bewys nie. Sy het later haar metode van werk in 'n onderhoud uiteengesit. Sy het gemeld dat sy die avontuur Famous Five in slegs vier dae op papier neergepen het.

Blyton is twee keer getroud en het twee dogters gehad. Sy is op 28 November 1968 in Hampstead (Londen) aan Alzheimer se siekte oorlede.

Afrikaanse vertaling

Die Noddy-reeks is in Afrikaans vertaal:

• Knikkie gaan na speelgoedland (boek no 1)
• Hoera vir klein Knikkie (boek no 2, nuwe uitgawe)
• Knikkie en sy kar (boek no 3)
• Wees dapper, klein Knikkie (boek no 4)
• Pas tog op, Knikkie (boek 5)
• Jy’s 'n goeie maat, Knikkie! (boek 6)

Eksterne skakels

• Wikimedia Commons het meer media in die kategorie Enid Blyton.