Falco (sanger)
Falco (* 19 Februarie 1957 in Wene; † 6 Februarie 1998 naby Puerto Plata, Dominikaanse Republiek) was die verhoognaam van Johann "Hans" Hölzel, 'n Oostenrykse sanger en musikant van wêreldfaam, wat hy uit bewondering vir die DDR-skispringer Falko Weißpflog in 1977 gekies het.[1] Sy treffer Rock Me Amadeus is tot vandag die enigste liedjie met Duitse lirieke wat boaan die Amerikaanse Billboard Hot 100-trefferlys gestaan het – 'n posisie wat Falco drie weke lank kon beklee.[2][3] Met 20 miljoen album- en 40 miljoen enkelsnitverkope is Falco steeds die suksesvolste Oostenrykse sanger ooit.
Falco | |
|---|---|
 Falco saam met die aktrise Ursela Monn in 1986 | |
| Agtergrondinligting | |
| Geboortenaam | Johann "Hans" Hölzel |
| Gebore | 19 Februarie 1957 Wene, Oostenryk |
| Sterf | 6 Februarie 1998 Tussen Villa Montellana en Puerto Plata, Dominikaanse Republiek |
| Genres | New wave • Neue Deutsche Welle • rock • pop • hip hop |
| Beroep(e) | Sanger, liedjieskrywer, rapper |
| Instrumente | Stem, klavier, baskitaar, kitaar |
| Jare aktief | 1977–1998 |
| Etikette | Sony • EMI • Warner Music |
| Assosiasies | Thomas Lang |
| Webwerf | https://www.sonymusic.de/kuenstler/falco |
Die sanger het oorspronklik 'n akademiese opleiding aan die Weense Jazz-konserwatorium begin, maar sy studies daar in 1976 gestaak. Vyf jaar later het Falco, wat onder meer deur David Bowie beïnvloed is en net soos dié Britse superster 'n tyd lank in Wes-Berlyn gebly het,[4] sy deurbraak op die Europese musiekmark met die enkelsnit Der Kommissar bereik wat in die meeste lande boaan die trefferlys gestaan en selfs in Kanada goud behaal het. So groot sy sukses as sanger in die volgende jare ook was, het dit groot druk op 'n buitengewoon ambisieuse kunstenaar soos Falco geplaas. Hoë verwagtinge het oorgegaan tot 'n strewe na perfeksionisme, maar het ook 'n vrees by hom gewek om moontlik nie meer aan dié verwagtinge te kan voldoen nie.
Belangsteling in Falco se musiek het geleidelik afgeneem totdat hy in 1995 weer groot sukses met die enkelsnit Mutter, der Mann mit dem Koks ist da behaal het wat hy onder die pseudoniem T>>MA vrygestel het – 'n ou Berlynse treffer wat Falco in 'n tegnomusiekstyl bewerk het. 1996 het Falco hom in die Dominikaanse Republiek gevestig om aan nuwe projekte te werk. Falco se ontydige dood in 'n motorongeluk in 1998 in dié Karibiese land, waar hy 'n klankateljee ingerig het, bly tot vandag toe raaiselagtig, maar met inagneming van die omstandighede was dit geen selfmoord nie, soos deur sommige verslaggewers beweer is. Al het die amptelike lykbeskouingverslag bepaal dat die sanger onder die invloed van kokaïen en drank bestuur het, het Falco se voertuig met 'n bus gebots wat teen 'n buitensporige spoed van meer as 100 km per uur gery het. Die sanger is blykbaar op slag dood.[5]
Falco-restaurant in Wene
wysigOp 19 Februarie 2019 het 'n restaurant (met kroeg en klub), wat aan Falco gewy is, sy deure in Wene geopen.[6]
Verwysings
wysig- ↑ www.mdr.de: Rock me Amadeus - Wie Falco zu seinem Namen kam. Besoek op 19 Junie 2018
- ↑ billboard.com
- ↑ Spiegel Online, 18 Februarie 2007: Sänger Falco – Amadeus des Pop. Besoek op 16 Februarie 2017
- ↑ www.falco.at: Falco se biografie - "Die Weichen werden gestellt". Besoek op 19 Februarie 2017
- ↑ falcoworld.net: Der Tod des Falken. Besoek op 17 Februarie 2017
- ↑ Falco.net, 20 Februarie 2019: Sensation: Falco-Lokal in Wien eröffnet. Besoek op 18 Mei 2020