Ferrara

Ferrara is die administratiewe setel van die gelyknamige provinsie in die Italiaanse streek Emilia-Romagna, geleë aan die regteroewer van die Porivier. Die rivierarm Po di Volano vloei deur die historiese middestad (Centro storico) wat deur Unesco tot wêrelderfenisgebied verklaar is. Ferrara is die setel van 'n Rooms-Katolieke aartsbiskop en een van die oudste universiteite in Europa, die Universiteit Ferrara wat in 1391 gevestig is.

Comune di Ferrara
Stad
Die katedraal van Ferrara
Vlag Wapen
Comune di Ferrara Ligging van Ferrara in Italië
Koördinate: 44°50′00″N 11°37′00″O
Land	Italië
Streek	Emilia-Romagna
Provinsies	Ferrara (FE)
Eerste verwysing	753 n.C.
Regering
• Burgemeester	Alan Fabbri (Lega)
Oppervlak
• Totaal	405,16 km2 (71 vk. myl)
Hoogte	9 m (30 ft)
Bevolking
• Totaal	132 097
• Digtheid	326/km2 (840/vk. myl)
Tydsone	UTC+1 (MET)
• Somertyd	UTC+2 (MEST)
Poskode	44121-44124
Skakelkodes	0532
Webwerf	commune.fe.it

Die Castello Estense se magtige versterkings verduidelik die aard van politieke betrekkinge tussen Noord-Italië se heersende families in die Middeleeue

Beveiliging van die beskadigde Palazzo della Borsa nadat Noord-Italië in Mei 2012 deur 'n reeks swaar aardbewings getref is

Ferrara is een van min groot nedersettings in Italië wat sy oorsprong nie in die Romeinse antieke het nie, maar eers in die Middeleeue gestig is. Die destydse versterkings en stadsmuur het volledig bewaar gebly. Onder die bewind van die heerserfamilie d'Este, wat onder Italië se voorste beskermhere van Renaissance-kuns gereken word, is Ferrara in die 14de eeu uitgebou tot 'n eersterangse sentrum van Renaissance-boukuns. Die hofargitek Biagio Rossetti se uitbreiding van die middestad is een van die vroegste Europese voorbeelde van stadsbeplanning.

Die waterkasteel Castello Estense het gedurende Ferrara se bloeitydperk in die 14de en 15de eeu as hertoglike setel gedien en – naas opulente privaatvertrekke – die d'Este-familie se kunsversameling gehuisves. 'n Tweede eersterangse argitektoniese besienswaardigheid is die katedraal van Ferrara in die Romaans-Gotiese styl met 'n marmer-kloktoring, ingewy in 1135 en gewy aan Sint Joris as beskermheilige van Ferrara.

Aardbewings hou, soos elders in Italië, 'n konstante bedreiging vir Ferrara se kunsskatte in. Op 20 Mei 2012 is talle historiese geboue en kerke in Ferrara en sy omgewing deur 'n aardbewing ernstig beskadig, waaronder die Castello Estense se Leeutoring.

Sien ook

• Lys van Wêrelderfenisgebiede

Eksterne skakels

• Wikimedia Commons het meer media in die kategorie Ferrara.
• (en) (fr) Amptelike Unesco-bladsy