Flooi du Plessis

Francois du Plessis is (1918 - 1995) op 8 Januarie 1918 op Petrusville gebore, waar hy ook groot word en sy skoolopleiding ondergaan. Hy is bekend as skrywer.

Francois du Plessis
Gebore	Florence Barbara Mathe 8 Januarie 1918 Petrusville
Sterf	1995
Nasionaliteit	Suid-Afrika
Alma mater	Universiteit van Stellenbosch
Beroep	Hoofbibliotekaris
Bekend vir	“Rympieboek vir kinders”, wat in 1963 met die C.P. Hoogenhout-prys bekroon word

Lewe en Werk

Hy studeer verder aan die Universiteit van Stellenbosch en behaal die B.A.-graad in 1938, terwyl hy dieselfde jaar lid is van die Unie Debatsvereniging en ook op die Studenteraad dien. In 1939 sluit hy hom aan by die Parlementêre Biblioteek, terwyl hy terselfdertyd klasse in Biblioteekkunde loop aan die Universiteit van Kaapstad. In 1943 word hy aangestel as organiseerder vir die Vereniging vir Boekedistribusie, wat later die Kaapse Biblioteekdienste word. Hy help om die Kaapse Biblioteke, ’n orgaan van die Biblioteekdienste, te ontwikkel en is ook verantwoordelik vir die Kaapse Biblioteek Uitbreidingsvereniging, wat biblioteekdienste vir die Kleurlinggemeenskap bevorder.

In 1945 sluit hy as onder-bibliotekaris by die Universiteit van Stellenbosch aan en gee vanaf 1956 tot 1961 klas in Boekkeuse en Naslaanwerk by die nuutgestigte Departement van Biblioteekkunde. Vanaf 1967 is hy hoofbibliotekaris, ’n posisie wat hy tot met sy aftrede in 1983 beklee. Tussen 1962 en 1964 is hy voorsitter van die Suid-Afrikaanse Biblioteekvereniging. Sy professionele aktiwiteite sluit in lidmaatskap van die Van Riebeeck Vereniging, die Senaat van die Universiteit van Stellenbosch, die Interuniversitêre Biblioteekvereniging en sameroeper van die Noord-Kaap Streekskomitee. Hy is redakteur en uitgewer van Huis en Haard. Voor sy aftrede is hy ook ten nouste betrokke by die beplanning van die uitbreiding van die biblioteek met die oprigting van die J.S. Gericke Biblioteek. Op universiteit toon hy deurgaans ’n sterk belangstelling in sport en rig ’n rugbyspan af, terwyl hy ook voorsitter is van die universiteit se krieketklub. Hy is in 1949 met Doreen Wookey getroud en hulle het vier kinders, ’n seun (Riaan) en drie dogters (Lise, Nina en Jane). In 1960 en 1961 toer hy en sy vrou deur Amerika, terwyl hulle biblioteke besoek as deel van die VSA-SA Leierskapuitruilingsprogram. Ná aftrede gaan bly hy en sy vrou op Clanwilliam. Hy is in 1995 oorlede.

Skryfwerk

Hy skryf kortverhale wat in die veertigerjare in Die Huisgenoot en Die Brandwag gepubliseer word. Sy debuut maak hy as kinderdigter met “Rympieboek vir kinders”, wat in 1963 met die C.P. Hoogenhout-prys bekroon word. Katrine Harries was verantwoordelik vir die illustrasies in hierdie boek. Van sy kinderverse word opgeneem in “Verskombers”, “Storiehuis”, “Woordpaleis” en “Nuwe kleuterverseboek”. Nog ’n publikasie vir kinders is “Die eenbeen-kraanvoël”, ’n beryming van ’n ou Italiaanse verhaal, terwyl hy ook Joan Cass se “Die bootrit”, Ursula Kirchberg se “Ou beweblaar, die populier” en Quentin Blake se “Meester Viljoen” in Afrikaans vertaal. “’n Ding wat byt” is ’n bundel met geestige limerieke. Van sy gedigte word opgeneem in Gerrit Komrij se bloemlesing “Die Afrikaanse poësie in ’n duisend en enkele gedigte”. Na sy dood toonset Pieter de Villiers van sy kleuterrympies en word dit onder andere deur die Tygerbergse Kinderkoor opgevoer.

Eerbewyse

In 1986 word hy vereer as lewenslange erelid van die Suid-Afrikaanse Instituut vir Biblioteek- en Inligtingswese en in 1992 word die Africana kamer in die Universiteitsbiblioteek na hom vernoem.

Publikasies

• 1963 – Rympieboek vir kinders
• 1991 – ’n Ding wat byt

Vertalings

• 1964 – Die eenbeen-kraanvoël
• 1966 – Die bootrit – Joan Cass
• 1969 – Ou beweblaar, die populier – Ursula Kirchberg
• 1983 – Meester Viljoen – Quentin Blake

Bronne

Boeke

• Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste uitgawe 2005

Tydskrifte en Koerante

• Anoniem “Vreugde oor Flooi se nalatenskap” “Keur” 13 Junie 1997
• Botha, Hanna “Mensemens Flooi het biblioteek beliggaam” “Die Burger” 14 Oktober 1995
• Stephan, Julene “Oom Flooi se pittige limerieke vermaak op Leipoldt fees”

Internet

• Van den Berg, Zirk Die Burger: http://152.111.1.87/argief/berigte/dieburger/1991/11/23/7/1.html Geargiveer 13 Maart 2016 op Wayback Machine