Gereformeerde kerk Durban-Wes

Die Gereformeerde kerk Durban-Wes was die derde gemeente van die Gereformeerde Kerke in Suid-Afrika in Durban, KwaZulu-Natal, maar ook die eerste wat ontbind het.

Gereformeerde Kerk Durban-Wes
Sluit in	Bellair New Germany Yellow Wood Park
Denominasie	Gereformeerde Kerk
Klassis	Natal
Huidige predikant(e)	H.B. Coetsee (laaste)
Belydende lidmate	236 (1989)
Dooplidmate	86 (1989)
Adres	Dickensweg 310 Bellair, Durban
Geskiedenis
Stigtingsdatum	4 Februarie 1968
Afgestig van	Durban
Eerste predikant	G.B.C. Bester (1968–'75)
Datum ingelyf	1990
Ingelyf by	Durban

Die kerkgebou soos dit in 2017 gelyk het, 27 jaar nadat die gemeente ontbind het.

Ds. G.B.C. Bester, van 1968 tot 1975 die eerste leraar, en sy gesin: Anita, Alrina en Bone.

Ds. Pieter van der Walt, leraar van 1975 tot 1982, as eerstejaarstudent aan die PU vir CHO in 1965 toe hy die Abe Bailey-beurs gewen het.

In die dekade ná 1960 het die Gereformeerde kerk Durban so gegroei dat dit wenslik was om nog ’n deel daarvan af te stig nadat Noord-Durban reeds in 1952 tot stand gekom en dele soos Durban-Noord self, Stanger, Umhlanga en Berea ingesluit het. Op 4 Februarie 1968 het 12 wyke wes van die ou Suidkuspad tot by Pinetown, waar die Gereformeerde kerk Pinetown eers in 1986 van Durban-Wes sou afstig. In die stigtingsjaar het die plek van eredienste na die Boy Scouts-saal in Bellair verskuif. Dit was nie ’n oplossing op lang termyn nie, want Sondae voor die diens moes die saal eers netjies gemaak word ná die danspartytjies van ander huurders die aand vantevore.

Later in die stigtingsjaar is toe besluit om ’n erf koop by Dickensweg 19, Bellair, en ’n kerkgebou op te rig. Twee lidmate was ten nouste by die kerkbou betrokke: P.F. Pretorius as argitek en Jaap van den Berg as bouaannemer. Die bouwerk het in Julie 1971 begin en op 19 Augustus 1972 is die gebou in gebruik geneem. Die gebou is so ontwerp dat die ingang na die kerk en saal ’n voorhof vorm wat deels onder dak is. Die kerkruimte is in ’n driehoek ontwerp met die hoogste deel by die preekstoel. Die sitplekke is sirkelvormig aangebring. Dié gebouekompleks het ook ’n moederskamer, kombuis en woonstel ingesluit.

Durban-Wes het in 1990 ontbind, waarna die leraar en lidmate oorgegaan het na die moedergemeente. Die kerkkompleks is blykbaar oorgeneem deur ’n Christelike skool.

Predikante

1. Bester, Gert Barend Cornelius, 1968–1975
2. Van der Walt, Pieter Johannes, 1975–1982
3. Laufs, Dirk, 1982–1989
4. Coetzee, Hendrik Bernardus, 1989–1990 (waarna Durban ná ontbinding tot sy dood op 27 Julie daardie jaar)

Bronne

• (af) Harris, C.T., Noëth, J.G, Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

Eksterne skakels

• (en) Die destydse kerkperseel soos te sien op Google Maps. Die kerk is die driehoekige gebou in die middel van die beeld. URL besoek op 28 November 2015.