Gereformeerde kerk Potchefstroom-Mooirivier

Die Gereformeerde kerk Potchefstroom-Mooirivier was die jongste nuwe, Afrikaanse gemeente van die GKSA in Potchefstroom omdat die Gereformeerde kerk Potchefstroom-Die Bult, wat 24 jaar later in 2011 gestig is, in werklikheid ’n samestelling is van Potchefstroom-Noord en Noordbrug.

Die Gereformeerde kerk Potchefstroom-Mooirivier het in 1987 van die Gereformeerde kerk Potchefstroom-Suid afgestig. Aan die begin het die twee gemeentes Potchefstroom-Suid se kerkgebou gedeel, maar kort voor lank het die nuwe gemeente die behoefte aan ’n eie kerkgebou gevoel. Die Berlynse sendingkompleks, wat destyds taamlik vervalle was, het beskikbaar geraak en die gemeente het dit aangekoop. Die gebouekompleks het uit ’n kerk, pastorie, koetshuis en skooltjie bestaan en is in die jare 1872-'75 gebou nadat die hoeksteen in eersgenoemde jaar gelê is. Dit is die derde oudste gebou in Potchefstroom.

Nadat die Berlynse Sendinggenootskap die geboue ontruim het, het dit bouvallig geword en is later danksy ’n groot restourasiepoging deur Harriet-Jane Bird opgeknap. Nadat sy ook eindelik die perseel ontruim het, het dit opnuut vervalle geword.

Die Gereformeerde kerk Potchefstroom-Mooirivier het die geboue vroeg in 2002 gekoop. Destyds het die gemeente 206 belydende en 64 dooplidmate gehad, vergeleke met die huidige (2016) 119 en 14. Die jongste restourasiewerk is weer deur Harriet-Jane Bird, in samewerking met die gemeente, onderneem. Die kerkgebou is opgerig in die koloniaal-Gotiese styl. Die preekstoel staan in ’n nis wat eens op ’n tyd ’n doopbad was. Agter die preekstoel is ’n venstertjie met die oorspronklike kleurglas, wat as voorbeeld gedien het om die res van die vensters se ruite met loodglas te vervang. Lidmate het self die vensters gebou. Die skooltjie het ’n rietplafon en word as konsistorie gebruik. Die deurkosyne van dié gebou is laer as normaal, naamlik net 1,8 m.

Die gemeente het in 2018 ontbind toe ds. Koos Mouton sy emeritaat aanvaar het. Hy is emeritus predikant van Potchefstroom-Oos.

Predikante wysig

  1. Schalekamp, dr. McDonald Etienne, 1987 – 2002
  2. Van der Schyff, dr. Stephanus Petrus, 2003 – 2009.
  3. Mouton, Jacobus Frederik, 2010 – 2018 (laaste predikant; emeriteer)

Bronne wysig

  • (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Aministratiewe Buro.
  • (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
  • (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.