Gweru

Gweru (voorheen Gwelo) is die hoofstad van Zimbabwe se sentrale provinsie en ook die land se vierde grootste stad, naas Harare, Bulawayo en Mutare.

Gweru (vroeër Gwelo)
Leuse(s):  "Progress"
Gweru
Koördinate: 19°25′0″S 29°50′0″O
Land	Zimbabwe
Provinsie	Midlands
Hoogte	1 410 m (4 630 ft)
Bevolking
• Totaal	141 260
Tydsone	UTC+2 (SAT)

Die stad is in 1894 gestig, verkry in Julie 1914 munisipale status en het stadstutus in 1971 verwerf. Die belangrikste bedryf om die stad is boerdery terwyl nywerheidsontwikkeling baie tot die stad se voorspoed bygedra het tot met die ineentsorting van die land se ekonomie ná 2000.

In 1960 was die stad se bevolking 27 290, waarvan 8 110 wit was, 500 bruin en Indiërs, en 18 680 swart. Die geraamde bevolking in 2007 was 148 935.

NG gemeente

Voor die afstigting van Gwelo is dit as buitepos van die Bulawayo-gemeente bedien. Op 6 November 1920 vergader die ringskommissie van die Ring van Bulawayo op Gwelo in 'n sinkkerkie en 'n hele dag se beraadslaging, veral oor die vaslegging van grense, is tot die afstigting van die gemeente oorgegaan. Dit was maar die vyfde gemeente in die destydse Suid-Rhodesië.

Ds. J.N. Geldenhuys van Bulawayo is vir die tweede maal beroep en op 3 Junie 1922 bevestig. Hy vetrek weer in Oktober 1925 waarna sewe vrugtelose beroepe uitgebring word voor ds. G.J. van Zyl op 3 Februarie 1927 bevestig is. Hy het die land na 16 jaar as 'n gebroke man weens swak gesondheid verlaat. Dit is heel te verstane aangesien hy in der waarheid sewe gemeentetjies (met al die buiteposte) moes bedien.

Ds. H. Botha volg ds. Van Zyl op 9 Januarie 1944 op. Ná 'n bedrywige bediening van meer as se jaar verlaat hy en sy vrou die land om na die NG gemeente Fauresmith te gaan. Ds. en mev. Botha was nie net vir Gwelo nie, maar vir die hele Suid-Rhodesië van onskatbare waarde op geestelike sowel as tydelike gebied en het 'n groot aandeel aan die opbou van Noord-Rhodesië (Zambië) vir die kerk gehad.

Soos die ander gemeentes in die land het Gweru se lidmaattalle na onafhanklikheid dramaties afgeneem van 391 in 1978 tot 128 in 1994, 50 in 2006 en 3 in 2008.

Bronne

• Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.
• George, K.J. (red.), Official South African Municipal Year Book 1961-1962, Pretoria, 1962.
• Mayhew, Vic (red.), Reader’s Digest Illustrated Guide to Southern Africa, The Reader’s Digest Association South Africa (Pty.) Limited, Kaapstad, 1980.