Hendrik Stoltz

Ds. Hendrik Jacobus Stoltz (gebore 22 Junie 1965 op Germiston) is sedert 2005 ’n predikant in die Gereformeerde Kerke in Suid-Afrika.

Ds. Hendrik Stoltz
Naam	Hendrik Jacobus Stoltz
Geboorte	22 Junie 1965 Germiston, Gauteng
Kerkverband	Gereformeerd
Gemeente(s)	Odendaalsrus 2005–2008, Bloemfontein-Suidheuwels 2008–2013, Ontdekkers 2013–hede
Jare aktief	2005–hede
Kweekskool	Potchefstroom

Kinderjare

Hendrik Stoltz is aan die Oos-Rand gebore as die vierde kind van wylie Arie en Heybey Stoltz en het grootgeword in die Gereformeerde kerk Primrose en belydenis onder ds. Pieter du Plessis afgelê. Hy het gematrikuleer aan die Hoër Tegniese Skool Jan de Klerk, Primrose, Germiston. Op skool het hy rugby gespeel en was in matriek die kaptein van die eerste rugbyspan. Hy het ook karate tot op derde bruin gordel gedoen. Tydens sy hoërskool jare was hy ’n aktiewe lid van die Jongeliedevereniging en het verskeie Bonds- en Kongreskampe bygewoon.

Opleiding

Nadat hy sy twee jaar diensplig as onder-offisier in die Pantserkorps voltooi het, het hy gekwalifiseer as meulmaker (millwright) by die destydse Suid-Afrikaanse Spoorweë. In 1994 het hy sy Nasionale N-diploma in Meganiese Ingenieurswese voltooi. Op die jeugdige ouderdom van 34 het hy en sy gesin aan die begin van 1999 na Potchefstroom verhuis om voltyds teologie te studeer.

Gesinslewe

Hy en Mockie (née De Beer) het mekaar ná sy diensplig ontmoet toe hulle saam by D’Kar-hulpprojekte in Botswana betrokke geraak het. Op 18 Junie 1988 is hulle in die Gereformeerde kerk Germiston deur ds. Frik van Deventer in die huwelik bevestig. Hulle het twee kinders, Henk en Eunice, en ’n skoondogter, Jo-Nica.

Roeping

Die grootste uitdaging in sy bediening is om te midde van soveel vals predikers die suiwer evangelie aan jong mense te bedien. In ’n samelewing wat al hoe meer wegstap van die Bybel af, wil hy dat oud en jonk ’n liefde en waardering vir die Bybel en ons Belydenisskrifte moet hê. As hy net ’n instrument kan wees in mense se lewe sodat hulle Christus meer en meer kan liefhê en hulle meer en meer kan groei in hulle gehoorsame navolging van Hom, sal hy uiters dankbaar en geseënd wees.

Stokperdjies

Ds. Hendrik se groot liefde as hy nie preek maak nie, is om te kook. Van lekker geregte tot koeke, terte, blatjang of souse. Braai is vir hom soos terapie en niemand mag inmeng as hy eers begin vuur maak nie.

Bron

• E-posonderhoud gevoer op 18 Junie 2020.