Gereformeerde kerk Primrose

Die Gereformeerde kerk Primrose was ’n gemeente van die Gereformeerde Kerke in Suid-Afrika met sy middelpunt in die voorstad Primrose, Germiston, Gauteng.

Gereformeerde Kerk Primrose
Sluit in	Rose Acres Primrose Germiston (noord van R29) Bedfordview (suid van N12/R24) Knights- en Delmore-kliniek
Klassis	Sentraal-Oos-Rand
Huidige predikant(e)	Jan du Preez (emeritus)
Belydende lidmate	32
Dooplidmate	1
Adres	H.v. Chruchilllaan en Roosweg, Primrose
Geskiedenis
Stigtingsdatum	28 Julie 1946
Eerste predikant	A.J. Pelser (1949–'52)
Datum ontbind	31 Januarie 2023
Datum ingelyf	Alberton

Die kerkgeboue, einde 2017.

Ds. A.J. Pelser was van 1949 tot 1952 Primrose se eerste leraar.

Ds. N.J. Grobler, die leraar van 1955 tot 1959.

Ds. Jan Visser, die leraar van 1959 tot 1969.

Ds. Pieter du Plessis, leraar van 1969 tot 1983, en sy vrou, Nannie.

Die Gereformeerde kerk Primrose het op 28 Julie 1946 van die oudste Gereformeerde kerk aan die Oos-Rand, Germiston, afgestig as die agtste gemeente in dié deel van die Witwatersrand. Sy gebied beslaan sowat 25 km²: die hele Primrose, alle voorstede van Germiston noord van die R29 en Bedfordview suid van die N12/R24.

Aan die begin het die gemeente een erediens elke Sondag in die Assembly-saal gehou. In 1952 het die kerkraad twee eenderse sale laat oprig in sowel Edenvale as Primrose. Hulle is gelyktydig op 9 Augustus 1952 in gebruik geneem. Primrose s’n se hoeksteen is deur ds. B.J. de Klerk gelê.

In Mei 1953 het wyke van Primrose afgestig as die Gereformeerde kerk Edenvale. In die Gereformeerde Kerk se eeufeesjaar (1959) het die moedergemeente 518 lidmate gehad en die dogtergemeente 165. Drie jaar later is die nuwe kerkgebou ingewy en ’n steen deur ds. J. Visser gelê. Die lidmate het blykbaar daarna toegeneem, want twee vleuels is vroeg in die sewentigerjare aangebou en die vergrote kerkgebou op 13 Februarie 1972 in gebruik geneem. Ds. P. du Plessis het by daardie geleentheid ’n spesiale steen onthul. Daarna is die ou kerk as saal gebruik.

Weens demografiese veranderings binne die gemeentegrense het Primrose se belydende lidmate van 231 einde 1997 tot 210 einde 2001 en 59 einde 2014 afgeneem. Die laaste diens van die gemeente is op 29 Januarie 2023 gehou toe ds. Hennie van Wyk, oudleraar, die Nagmaal bedien het. Die meeste van die handjievol oorblywende lidmate het aangesluit by die Gereformeerde kerk Alberton.

Predikante

1. Pelser, Andries Johannes, 1949–1952
2. Grobler, Nicolaas Johannes, 1955–1959
3. Visser, dr. Jan, 1959–1969
4. Du Plessis, Pieter, 1969–1983
5. Schalekamp, dr. Marius, 1983–1993
6. Van Wyk, dr. Hendrik Francois, 1993–2004
7. Du Preez, Jan Adriaan, 2009–2014 (in kombinasie met Germiston; aanvaar sy emeritaat)

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.