Henry Burnett

Henry John Richard Burnett (Portsmouth, Engeland, 24 Maart 1832 – 26 Oktober 1913, Houdmoed, distrik Vanrhynsdorp, Kaapland, Suid-Afrika) was ’n Suid-Afrikaanse boumeester en moontlik argitek van Britse herkoms.

Fraserburg se kerkraad het in 1855 'n kontrak met Burnett opgetrek vir die bou van 'n pastorie teen £1 100. Ds. Carl Arnoldus Bamberger was bes moontlik nou by die ontwerp daarvan betrokke. Dit dien al baie jare as die dorpsmuseum.

Burnett het hom op Fraserburg gevestig nadat die bouwerk aan die pastorie klaar was en dié huis vir hom gebou. Dit is in 1857 of 1858 voltooi. Burnett het die erf (vroeë no. 25, maar nou no. 328) op 12 September 1857 by die NG kerk gekoop. Dit was vroeër aan die huidige Voortrekkerstraat geleë, maar vandat 'n deel van die erf weggesny en die biblioteek daarop gebou is, is dit geleë by Meyburghstraat 10.

Feitlik niks is vandag meer oor Burnett se lewe of werk bekend nie, behalwe dat hy die eerste pastorie van die NG gemeente Fraserburg omstreeks 1855 gebou en hom toe op Fraserburg gevestig het. Hy was ’n seun van John en Eliza Anne Burnett, en is op 29 Augustus 1853 op Tulbagh getroud met Rosina Gertruida (of Geertruide) Petronella van Baalen (gebore Tulbagh, 12 Januarie 1828; oorlede Vanrhynsdorp, 15 Maart 1904).

Dis nie bekend wanneer hy die dorp verlaat het nie, maar die huis wat hy in 1857 vir sy gesin aan die huidige Voortrekkerstraat opgerig (en sekerlik ook ontwerp) het, is in 1926 aan die De Klerk-gesin verkoop. Hul een dogter, Elizabeth (Bessie) Viviers, en haar twee seuns, Chris en Fanie, het die huis ná haar man se dood bewoon. Sy het dit in 2014 aan sy sesde eienaar verkoop. Intussen is dit besit deur F.W. Buckle, J.A. Tromp, M.J.E. Tromp (gebore Van Wyk) en E.M. Jooste.

Minstens sewe kinders is uit Burnett se huwelik gebore, van wie die tweede en derde se geboorteplek as Fraserburg aangedui word:

• Rosina Christina Johanna (Houdmoed, Vanrhynsdorp, 2 Oktober 1860 – onbekend)
• Eliza Ann Reinbach (Ceres, 2 Julie 1855 – Port Elizabeth, 23 Januarie 1920)
• Jacobus Michiel (Fraserburg, 10 Januarie 1857 – Kaapstad, 13 September 1933)
• John Peter (Fraserburg, 5 Januarie 1859 – Stellenbosch, 6 Junie 1939)
• Anna Johanna Louw (Houdmoed, Vanrhynsdorp, 17 April 1862–onbekend)
• Mary (Houmoed, 11 Desember 1863 – Vanrhynsdorp, 9 Oktober 1930)
• Henry John Richard (29 September 1865 – Houdmoed, Vanrhynsdorp, 27 Junie 1934
• William Edwin (Clanwilliam, 1875 – Durban, 15 September 1934)

Bronne

• (af) Scholtz, dr. Adelbert in Restorica, Stigting Simon van der Stel, 1979:1.
• (af) Kotzé, D.A. 1951. Die Gemeente Fraserburg. 'n Eeufees-gedenkboek (1851–1951). Fraserburg: NG Kerkraad.
• (af) Olivier, ds. P.L.. 1952. Ons gemeentelike feesalbum. Kaapstad en Pretoria: N.G. Kerk-uitgewers.
• (en) Burnett se rekord op Ancestry.com. URL besoek op 8 Junie 2016.