Historiese Huise van Suid-Afrika
Historiese Huise van Suid-Afrika Beperk is ‘n maatskappy wat hom beywer vir die bewaring van geboue van kulturele en historiese belang vir die nageslag.
Veral dr. Anton Rupert was bekommerd oor die toenemende verwaarlosing en verdwyning van Suid-Afrika se historiese geboue en veral dié in die Kaaps-Hollandse boustyl.
Op 31 Maart 1966 is die firma as ‘n filiaal van die Rembrandt Groep gestig met Rupert as voorsitter en Imker Hoogenhout as besturende direkteur. Dit is ‘n eiendomsbeleggingsmaatskappy wat belê in geboue van historiese of estetiese belang. Rupert se bewaringsfilosofie was dat as ‘n ou gebou na restourasie nie bruikbaar is nie, die bewaring nie volhoubaar is nie. Daarom word die bewaring van die geboue op ‘n sakegrondslag benader en word die geboue verhuur. Tans word die meeste geboue gebruik as kantore en winkels.
Die Burgerhuis (van 1797) aan Die Braak op Stellenbosch huisves die hoofkantoor. Verskeie geboue op Stellenbosch en Graaff-Reinet, enkele Britse Setlaarshuise in Port Elizabeth en Grahamstad, die Ou Jongenskool (tans Olyfkranskollege), Paulsenhuis en die ou Residensie op Swellendam en Huis Vergenoegd in die Paarl vorm die firma se portefeulje. Hul wye ervaring met restourasieprojekte word wyd in die land benut. Daarom was hulle o.a. nou betrokke by die restourasieprojek op Tulbagh na die aardbewing van 1969.
Bibliografie
wysig- Burden, Matilda: 50 jaar - Historiese Huise 1966-2016. Stellenbosch: Historiese Huise van Suid-Afrika, 2016. ISBN 978-0-620-73074-7
- Dommisse, Ebbe: Anton Rupert – ‘n lewensverhaal. Kaapstad: Tafelberg, 2008. ISBN 978-0-624-04595-3