Die Hugenotekruis is 'n Christelike simbool wat in Frankryk ontstaan het ná die herroeping van die Edik van Nantes. Die kruis word met protestantisme geassosieer en spesifiek met die Franse Hugenote.[1]

Die hugenotekruis

Die Hugenotekruis is in 1688 deur die goudsmid Mystre van Nîmes ontwerp en deur hom vervaardig. Die kruis bestaan uit 'n Malteserkruis met vier Fleurs-de-Lis wat die arms van die kruis met mekaar verbind. Agt knoppies versier die buitepunte van die kruis se arms. Die Malteserkruis is tevore deur die Hospitaler Ridders van die Heilige Johannes van Jerusalem, ook bekend as die Ridders van Malta, gebruik. Die Ridders van Malta was 'n godsdienstige en Kruisvaarderorde wat in die 7de eeu in Jerusalem gestig is en in 1308 die eiland Rhodos beset het na die ineenstorting van die Kruisvaarderstate. Die orde van die Ridders van Malta is in 1530 gestig nadat Rhodos deur die Ottomaanse Turke verower is en hulle na Malta moes vlug waar hulle vir 4 eeue gewoon het - vandaar die naam "Malteserkruis".[1]

Die Hugenotekruis is ryk aan simboliek:[1]

  • Die kruis is 'n gesiene simbool van die Christelike geloof. Dit verteenwoordig nie net die dood van Jesus Christus nie, maar ook die oorwinning oor dood en goddeloosheid. Dit geld ook vir die maltese kruis wat in die Hugenotekruis gebruik word.
  • Die agt knoppies op die punte van die kruis se arms verteenwoordig die agt Saligsprekinge van Matteus 5:3-10.
  • Die vier fleurs-de-lis het elkeen drie blare wat in een opsig die goddelike drie-eenheid verteenwoordig en die altesaam twaalf blare die twaalf apostels. Dit kan ook die doringkroon verteenwoordig. Die fleurs-de-lis saam met die arms van die kruis neem die vorm van 'n hart aan wat dui op die lyding van Christus. Die fleurs-de-lis verwys as tipies Franse simbool ook terug na die moederland van die Franse Hugenote.
  • Onderaan die kruis hang 'n duif met uitgespreide vlerke in afwaartse vlug wat die Heilige Gees simboliseer. In tye van vervolging is die duif dikwels deur 'n pêrel, wat 'n traan voorstel, vervang.

Die Hugenotekruis word vandag algemeen in juweliersware gebruik of gegraveer op geboue van die Gereformeerde kerk in Frankryk. Dit is ook 'n onderdeel van die amptelike kenteken van die Gereformeerde Kerk in Frankryk.

Sien ook wysig

Verwysings wysig