Jan Smuts-standbeelde

Kaapstad het twee standbeelde van genl. J.C. Smuts. In die Kompanjiestuin is 'n beeld deur die Britse beeldhouer Sydney Harpley. Dit beeld Smuts informeel geklee uit soos hy dikwels op Tafelberg gaan stap het. Hierdie beeld is op 29 Mei 1964 deur sy dogter onthul. Daarna was daar groot ongelukkigheid oor die beeld omdat dit glo nie 'n goeie indruk van Smuts skep nie. 'n Nuwe komitee onder voorsitterskap van die burgemeester van Kaapstad, dr. Jan Dommisse, is gevorm om 'n aanvaarbare standbeeld van Smuts te verkry. Hierdie nuwe beeld deur Ivan Mitford-Barberton staan sedert Januarie 1974 in Adderleystraat voor die kultuur-historiese museum (die Ou Slawelosie, Ou Hooggeregshof) en naby die ingang tot die Kompanjiestuin. Smuts is in hierdie beeld 5,30 m hoog, staan op 'n voetstuk van 1,50 m hoog en beeld hom uit as 'n bergklimmer.

Standbeeld van Smuts in die Kompanjiestuin, Kaapstad.

Standbeeld voor die Ou Slawelosie in Kaapstad.

Die Smuts-standbeeld in Durban

Voor die stadsaal van Durban is 'n standbeeld van Smuts wat hom as staatsman en krygsman van wêreldformaat uitbeeld. Op die voetstuk van die standbeeld staan geskrywe:

In honour of Field Marshall the Right Honourable Jan Christiaan Smuts (1870–1950). Soldier, Statesman, Philosopher, Architect of the Union of South Africa and the British Commonwealth of Nations. A great son of South Africa who was shared by this country with the whole world.