Jeugdag

Dag wat die jeug van 'n land gedenk

Jeugdag is 'n dag wat die jeug van 'n land gedenk. In sommige lande, soos Suid-Afrika, is jeugdag ook 'n nasionale openbare vakansiedag.

Wêreldjeugdag 2000 in Rome, Italië, 2010
Wêreldjeugdag 2005 in Sydney, Australië

Internasionaal wysig

Internasionale Jeugdag word op 12 Augustus gevier. Die dag word amptelik deur die Verenigde Nasies erken (resolusie 54/120 van 1999).

Suid-Afrika wysig

In Suid-Afrika word Jeugdag jaarliks op 16 Junie gedenk ter nagedagtenis aan die 1976 Skoliereopstand in Soweto. Swart skoliere het in opstand gekom teen 'n regeringsbesluit dat beide Afrikaans en Engels op 'n 50-50 basis as voertale in die Bantoe-onderwys gebruik moes word.

Vroeër was die beleid van die onderwysdepartement nie landwyd eenvormig van toepassing soos vandag in Suid-Afrika nie. Elke provinsie (die Kaapprovinsie, Oranje-Vrystaat, Transvaal en Natal) het elk sy eie onderwysstelsel en kurrikulum gehad. Afrikaans en Engels as taalmedium in swart skole sou slegs in die Noord-Transvaalse gebied vanaf Januarie 1975 toegepas word in Standerd 5 (tans graad 7) en nie dwarsoor die Republiek van Suid-Afrika of sy protektoraat, Suidwes-Afrika (vandag Namibië) nie. In 1976 sou die sekondêre skole van die Noord-Transvaal voortgaan om hierdie stelsel deur te voer.[1]

Die vakke wat in Engels aangebied sou word is Algemene Wetenskap en die praktiese vakke (Huishoudkunde, Naaldwerk, Houtwerk, Metaalwerk, Kuns en Landboukunde), terwyl Afrikaans as medium gebruik sou word in Wiskunde, Rekenkunde en Sosiale Wetenskappe. Die moedertaal van die swart leerlinge sou as medium gebruik word tydens Godsdiens, Musiek en Kultuur.[2]

Ander besware was die swak toestand van die skole en die tekort aan handboeke. Verskeie kinders is dood of beseer nadat die Polisiemag op hulle losgebrand het om die skare in toom te hou. Dit het weer tot verdere opstande dwarsoor die land gelei waarin 600 mense gesterf het.[3]

Verenigde State van Amerika wysig

Die Verenigde State vier Jeugdag op 28 Februarie.

Ander jeugdae wysig

Die Rooms-Katolieke Kerk vier Wêreldjeugdag sedert 1984, toe dit deur Pous Johannes Paulus II ingestel was.

Sien ook wysig

Verwysings wysig

  1. The Afrikaans Medium Decree
  2. The Afrikaans Medium Decree
  3. Uys, Isabel. 2007. Feitegids: 'n Kernensiklopedie. Kaapstad: Pharos Woordeboeke. bl. 306

Eksterne skakels wysig